Back to Top
Vigilante banner image

Karta di Minister Janga rumbo Korte pa posponé kaso sivil


November 22, 2021 • 3 minüt pa lesa

Punda—E karta ku minister di Salubridat Públiko, Dorothy Janga a manda pa miembronan di direktiva BZV den Likidashon, ta bai Korte di Apelashon den un súplika pa posponé tratamentu, pendiente un investigashon ku e minister lo laga ehekutá.

Manera ta konosí, den BZV a bin konstatá bastante iregularidat, unda un direktiva transitorio a laga hasi investigashon riba pagonan kuestionabel den un kantidat di kasi 50 proyekto. Na promé instante, tabata trata di dos èks miembro di direktiva kende huntu ku un akountent J., mester tabata proseder pa pagonan riba proyekto tuma lugá, pero sin entrega kompleto di servisio. E kaso a yega asina leu ku aktual direktiva a entrega un kantidat di 6 keho na Ministerio Públiko, kual no a kondusí na un investigashon penal pero si a kondusí na tratamentunan i claim sivil

Unu dje proyektonan tabata esun di Medicard di 870 mil florin ku nunka a keda entrega pero ku via di miembronan di direktiva a prosesá e ofertanan via di e akountent J. Despues a bin sigui un seri di pagonan di mas, sin a responsabilisá esakinan. Tabata sospechá di por lo ménos 5 mion florin na pago. Entre mas dje proyektonan a konta un diferensha di 40 mil florin kual un miembro di direktiva a sali benefisioso afó riba pagonan pa proseder na  e fondonan di BZV. A kobra tambe 38 mil florin pa un rapòrt di apénas 18 página riba prosedernan interno pa ehekushon di kostonan pa kuido. A kobra 60 mil florin pa duna konseho riba e Fondo di AVBZ pero ora bai evaluá a bin resultá ku tabatin mal kobransa riba tarifa di ora. E direktiva transitorio aktual a deskubrí un seri di pagonan kuestionabel na sumanan di 266 mil florin, 65 mil florin, 75 mil florin, 61 mil florin, 103 mil florin, 62 mil florin, 74 mil florin.  Pa e promé partinan aki di sobrepago, BZV a claim bek for di e akountent J. un suma di 3.2 mion florin.

Pero korte di apelashon ta konkluí ku algun miembro di direktiva no tabata kulpabel di partisipá konsiente na pagonan ku e akountent J a sali benefisioso afó.  E suma total otorgá na proyekto ta wòrdu kalkulá na 5 mion florin. Ta sospechá ku pa kada siman tabatin un proyekto ta sali, segun korte sivil. Ta sospecha ku e.o. e akountent en kestion huntu ku mas a kobra BZV kasi 5.2 mion florin for di kual direktiva transitorio ta sospecha ku por lo ménos 4 mion florin tabata pagonan pa proyekto inefisiente.

E sospechonan di froude a bin sali na kla despues ku riba 12 di mei 2012 a manda 97% di e bolsa di asegurado pa SVB. Apesar di e desishon pa traspaso tòg a sigui saka proyekto, 290 mil florin i 890 mil florin pa investigashonnan di efisiensia. En total ta sospecha ku BZV a paga e akountent J. 5 mion florin durante un periodo di 2 aña. E akountent entre otro a protesta kontra di e akusashonnan di BZV i Korte di Apelashon a ordená pa posponé tratamentu di e kaso. Esaki tabata  pa duna chèns pa e apelantenan den e kaso (e.o. akountent) verifiká na informashon mas mihó. Prinsipalmente riba nan kostonan.

Entretantu, den karta riba 18 di Novèmber último, minister aktual, Janga a informá aktual miembronan di direktiva transitorio BZV di ta bai instalá un komishon pa hasi un investigashon. Segun Janga, el a hiba un kombersashon ku eks direktiva i pone tur kos riba un liña. E minister ta opiná ku aktual direktiva transitorio mester stòp tur proseso hurídiko kontra di miembronan di direktiva anterior, Abdalah Yarzagaray i eks akountent J.. Tambe e minister ke pa tene distansha for di e miembronan Abdalah i Yarzagaray konforme desishon di korte regardando nan derechinan i meskos ta konta pa e akountent J.. Minister Janga alabes a sugerí den su karta pa abogadonan di ámbos partido sinta na mesa kaduká tur proseder entamá kontra di e eks miembronan den Hunta di Direktiva na BZV.

E karta ku Minister di Salubridat Públiko a manda pa eks miembronan di Direktiva na SVB, lo sirbi komo un dokumentashon na Korte Sivil den Apelashon kual korte ta wardando pa pone un fecha nobo di tratamentu. Fuentenen a señalá ku abase di e karta, Yarzagaray, Abdalah i akountent J. lo súplika korte pa posponé tratamentu pendiente e investigashon di Minister Janga.



Login