Punda—Tim di Bakunashon ta sigur ku riba 90% di esnan kende a bakuna promé biah, lo bin tuma nan di Dos Bakuna. Na Kòrsou te ainda 33 mil persona for di 34 mil, kende a pasa nan promé Pfizer a bini pa nan di dos. Awor e periodo pa e di Dos Bakuna di Moderna ta drenta na vigor.

E Tim di Bakunashon ta kombensí ku e porsentahe di hende ku ta bin pasa nan di Dos Bakuna ta riba 90% sigur. E asuntu ta ku entre desèmber pa mei tabatin míles di siudadano na Kòrsou infektá ku Covid for di kual a yega pik di 1877 riba 13 di desèmber 2020 i despues un otro pik mas riba 9 aprel di 4.727 persona infektá.

Segun dr. Fitzgerald Semper i epidemiologo Iralice Jansen, MSc. BASc.,  no mester mira un relashon dirèkt entre e kantidat di persona kendenan a risibi nan promé bakuna lo bai tuma nan di dos. Esaki bou di sirkunstansha normal ta e kaso pero no ekskluí e grupo kende a haña Covid den e último 6 lunanan i esaki a wòrdu konfirmá pa un tèst di laboratorio, tin e posibilidat pa risibi un bakunashon so. No opstante esaki, un kantidat grandi di personanan aki ta biniendo pa tuma nan di dos bakuna. Segun e Tim di Bakunashon mester konsiderá tambe ku awor ta drenta e periodo bou di kua ta bai inisiá e di Dos Bakunashon pa Moderna. Mester apuntá ku na Kòrsou a kuminsá bakuna ku Moderna riba 12 di Aprel i ku despues di minimal 4 siman un persona ku a haña su promé bakuna ku Moderna, mag di risibi su di dos bakuna Esaki ta nifiká ku riba 10 mei a kuminsá pasa e di Dos Bakuna ku Moderna.

E sifranan apsoluto ta indiká te ainda ku no ta yegando 50% for di e Promé Bakunashon pero en bèrdat for di 9 mei e sifranan pa lokual ta tratando di Dos Bakuna ta subiendo riba mil persona diario. E último 4 dianan e pro medio diario pa di Dos Bakunashon tabata riba mil persona. Pues Tim di Bakunashon ta kombensí ku pa tantu Pfizer komo Moderna, riba 90% lo bin pasa nan di Dos Bakuna. Pa Pfizer esaki ya kaba ta 96% i djadumingu awor, 16 mei, entre 12:00-17:00 personanan ku no a logra pasa nan di dos bakuna ku Pfizer, tin oportunidat pa hasi esaki na WTC.