Otro grupo di kubano a keda gará i mandá bèk nan Cuba.

ESTADOS UNIDOS – Kasi 20 migrante kubano ku tabata biaha den un embarkashon, a keda detené despues di toka tera den oranan djasabra na Cayos de Florida i ta spera ku nan lo keda mandá bèk pa e isla karibense.

Segun a keda indiká pa outoridatnan estadounidense, den oranan di mardugá un total di 19 inmigrante kubano a toka tera den un embarkashon na Cayos de Florida, pa ta mas konkreto na Key Largo.

Tabata na alrededor di 4or di mardugá ku e agentenan a respondé na un aviso di personanan den un embarkashon na e sitio ariba menshoná. Aki a yega mesora i topa ku e migrantenan.

Ta spera ku e 19 kubano nan aki lo keda repatriá den e próksimo dianan.

Warda Kosta estadounidense a señalá di su banda, ku un tripulashon ya den oranan di djabièrnè tras di lomba a repatriá 26 kubano ku a yega Florida via laman.

E kubano nan aki a keda hibá te Puerto de Cabañas, na ost di La Habana.

Di otro banda a hasi un yamada na personanan pa kore e rísiko di subi laman den e situashonnan aki. Ademas a indiká ku tripulashon di Warda Kosta lo reskatá i repatriá kualke persona ku intentá di yega di forma ilegal na Estádos Unídos.

Entre dia 3 i 10 di mart tras di lomba, e tripulashon di e agensia federal ku ta patruyá na Florida i Pasos de los Vientos i tambe na La Mona, a impedí ku mas di 336 migrante a drenta Estádos Unídos ilegalmente.

Entre e mesun fecha nan aki, a repatriá otro 75 kubano i 194 haitiano.