Akusado i èks-polis Gregory “Chayenne” Gonzales.

Willemstad,– Ayera durante un regiezitting abogadonan mr Dickens, mr Ayubi i mr A Sulvaran a duna wes diferente petishon pa mas investigashon relashoná ku kaso di soborno.

E hòmber Sergo Francillon ta wòrdu akusá di soborno i lo mester a paga polisnan “Chayenne” Gonzales i Sheryl Emelina un suma di 15.300 florin pa asina risibí un pèrmit pa karga un arma di kandela. Aktualmente Francillon ta sintando un kondena di 10 aña paso na 2021, el a keda hañá kulpabel di e a duna e enkargo pa laga kima “belastingkantoor”.

E kaso di ayera tabata den forma di un “regiezitting” kaminda tantu abogado mr Dickens, mr Ayubi i mr A Sulvaran a presentá vários petishon pa demas investigashon.  Mr Dickens kende ta hibando defensa pa Sergo Francillon a pidi wes diferente petishon pa amplia e investigashon di e kaso aki. Di e diferente petishon nan, wes a honra pa tende deklarashon nan di polisnan Chayenne Gonzales i Sheryl Emelina di nobo. Tambe wes a honra pa tende testigu S. di nobo kende tabata labor komo “korpschef” den e periodo di e suseso. Tambe wes a honra pa hasi demas investigashon di outorisashon di un kompania ku Francillon lo tabata enbolbí kun’é.

Petishon ku wes a honra di abogado mr Ayubi ta pa tesigu S. duna deklarashon. Tantu abogado Ayubi, Dickens i Sulvaran por ta presente durante e interogashon di testigu S. Pa loke ta petishon nan di abogado mr A Sulvaran, el a pidi pa algun dokumentashon aidashonal ku ta den beslag. Akinan fiskal mr Hato-Willems mes a splika ku e lo duna abogado Sulvaran e dokumentashon adishonal.

E agentenan polisial ta keda akusá pa tuma plaka di soborno durante e periodo di novèmber 2016 i mart 2022. Segun OM, Francillon lo mester a paga e agentenan polisial un suma total di 15300,- florin via di su kompania ku yama S & Y pa asina e por haña un pèrmit di arma. Tambe e agentenan polisial ta keda akusá di tuma plaka, karchinan di fiesta i tambe bonnan di kuminda serka un hòmber di fam Snijders ku mes un meta.

Na di dos lugá, e agentenan ta keda akusá di hasi uzo no outorisá di nan outoridat. Segun ministerio públiko, ámbos a aktua deliberadamente kontra di lokual nan ta outorisá pa hasi. Nan a uza nan outoridat pa investigá i/òf supervisá, nan a prosesá i/of kompletá e solusitut pa pèrmit pa Francillion haña un arma di kandela pa defensa propio. Tur esaki, mientras minister di hustisia a para e posibilidat aki den un desishon ku el a tuma riba 9 di novèmber 2017. 

Na di tres lugá, e agentenan ta keda akusá di falsifikashon di dokumentunan. Durante e periodo di juni 2018 pa yanüari 2019, nan lo mester a falsifiká un karta di motivashon na 2018, dos “inkomstenverklaring” di finansas di Francillon di 2018 i 2019 i tambe un “desishon final” ( slot advies ). Por último e agente polisial Emelia ta keda akusá ku durante e periodo di 1 di yanüari 2020 pa 27 di sèptèmber 2022, e tabata fia hende sèn ( kredito ) i kobra nan interes sin tabatin e pèrmitnan nesesario.