Kaminda e suseso a tuma lugá.

Rotterdam,– E hòmber Ryan D. a skucha djarason di korte ku e mester sinta un kastigu di 20 aña relatá na un asesinato kometé riba 1 di yüni 2024.

Tabata un asesinato ku a tuma lugá algu despues di 3 or di mardugá nèt pafó di e diskotèk konosí komo “t Half Uurtje”. E asesinato lo a keda grabá ampliamente dor di kámaranan di seguridat den e área. Riba e grabashon por a nota kon 2 minüt pasá di 3 or, e akusado ta kana yega den e área. 1 minüt despues e akusado, Ryan D., lo tabata papia ku un persona pará nèt pafó di e diskotèk. Apénas 2 minüt pará pafó dje diskotèk e akusado ta wak kon e víktima ta kana sali pafó di e establesementu. Na momentu ku e víktima ta kana pasa un testigu ku yas skur, por wak klaramente riba e grabashon ku e akusado ta saka un arma di kandela for di su saku di yas. I ta dirigí e arma na kabes di e víktima. Práktikamente mesora e akusado ta lòs un bala ku ta alkansá kabes di e víktima i akinan e akusado ta pusha e hòmber di 32 aña di edat. E víktima ta bin kai mitar bou di un outo stashoná kaminda 5 minüt pasá di 3 or di mardugá e akusado bandoná e sitio dje delito.

Demas informashon médiko ta konkluí ku e víktima a bin fayesé debí na e herida na su kabes 1 dia despues, riba 2 yüni 2024. Den ménos ku 24 ora outoridatnan na Rotterdam ta logra detené e akusado, kaminda riba 22 di yanüari e kaso a keda tratá den su kontenido.

Segun informashon nan, e akusado lo tabata tin un problema pa algun tempu kaba ku e víktima i a bin resultá ku tabata 1 luna promé ku e asesinato e akusado lo a kumpra e arma di kandela pa defensa propio. Fo’i dje dia di kompra e akusado lo tabata kana armá riba forma regular, sigur mirando e konflikto entre e Ryan D. i e víktima.

Den e kaso aki korte a investigá ampliamente si ta trata aki di un asesinato planiá. Defensa di Ryan D. a indiká ku e dossier investigativo no ta elaborá riba akshon nan ku a tuma lugá promé ku 1 di yüni 2024 ku por konkluí un proseso planiá di asesinato.  Segun e defensa, e akusado a simplemente topa e víktima na e sitio kaminda i ta un kuestion di e tempu robes na un sitio robes. Apesar di e defensa sólido, korte a bini ku un otro konklushon. Riba e grabashon korte a bin nota ku e akusado tabata muchu trankil na momentu ku el a wak e víktima ta kana bin. Alabes Ryan D. a opta pa kana armá den direkshon di un grupo. Sinembargo, e akusado den tur su trankilidat a simplemente saka e arma i lòs e tiru dirigí riba kabes di e víktima i pa despues bandoná e sitio den ménos ku 5 minüt.

Korte den nan veredikto a konkluí un kastigu di 20 aña ta na su lugá. I Ryan D. lo mester paga alrededor di 170 mil euro na daño perwisio repartí entre 8 partido perhudiká.