Back to Top
Responsive image
E korant di pueblo

Kastigu pa personanan ku no tene karentena na Sint Maarten


September 11, 2021 • 1 minüt pa lesa

Minister di Salú Públiko, Desaroyo Sosial i Labor (VSA) na Sint Maarten, Omar Ottley.

PHILLIPSBURG- Minister di Salú Públiko, Desaroyo Sosial i Labor (VSA) na Sint Maarten, Omar Ottley, a atvertí personanan ku no ta tene nan mes na reglanan di karentena, inkluso doñonan di trabou ku ta eksigí pa empleadonan kibra ku e regla di karentena, ku esaki lo tin konsekuensia.

Durante konferensia di prensa minister Omar Ottley a duna di konosé ku Servisionan di Prevenshon Kolektivo (CPS) ta informé ku tin varios persona ku no ta kumpliendo ku e reglanan stipulá pa loke ta trata karentena. CPS a informá ku ora ku nan yama pa kontrolá diferente persona a resultá di ta na trabou of den enkuentronan sosial.

Segun Omar Ottley, e komportashon aki ta kontribuí na plamamentu di e vírus ku konsekuensia ku mas persona ta keda infektá, hospitalisá i fayesé pa motibu di Covid-19.

Un motibu pakiko personanan no ta kumpli ku karentena ta pasobra doñonan di trabou ta pone nan trahadónan bin trabou maske ku nan mester ta den karentena.

Ottley a anunsiá ku lo tin konsekuensia serio pa esnan ku ta violá e reglanan di karentena stipulá pa Gobièrnu. Segun e minister inspekshon di Salú Públiko lo presentá e informashon di tur persona ku no ta tene nan mes na e reglanan di karentena na fiskal i nan lo disidí e sankshon adekuá pa e personanan konserní.

Login