Parlamentario pa partido KEM, Michelangelo Martines.

Willemstad,– Frakshon di partido KEM ta rekordá minister di Hustisia riba e prioridatnan den e programa di gobernashon kaminda nan ta splika ku algun di nan sigur ta:

– Optimalisá KPC, bou di kua rekrutá personal nobo (no tin fecha menshoná);

– Aserkamentu dirigí, spesífiko pa prevení e hopi frekuente kriminalidat bou di kua, ladronisia di outo, atrako i kiebro/ladronisia na kasnan (no tin fecha menshoná);

– Implementashon di e maneho di arma(aña 2022);

– Introdukshon di e trayekto di renovashon di SDKK(no tin fecha menshoná);

– Optimalisashon di landsresherche (no tin fecha menshoná);

– Optimalisashon di ORV(= Opleidingsinstituut Rechtshandhaving en Veiligheidszorg) (no tin fecha menshoná);

– Optimalisashon di Brantwer (no tin fecha menshoná);

– Optimalisashon di Toelatingsorganisatie(no tin fecha menshoná);

– Plan di rekuperashon Nashonal i plan di desaroyo fortifikashon di derecho di estado (no tin fecha menshoná).

Resosialisashon:

– E aktual prizon, su infrastruktura ta difikultá e posibilidat, pa na un manera digno, pa detenidonan ser resosialisá. No ta posibel pa resosialisá un departamentu di 120 detenido/prezu, ku solamente 5 miembro di personal. Trabou, formashon i training, ta di vital importansia den e proseso di resosialisashon. Partido KEM, ta di opinion, ku mester remediá tur asuntu, ku ta stroba e proseso menshoná. Ora prezunan, kaba di sinta nan kastigu, pa violashon di lei, nan mester por integrá di nobo den komunidat.

TBS(= Ter BeschikkingStelling met dwang):

– Frakshon KEM ta lamentá tambe ku Kòrsou ainda no tin un klínika TBS. Esaki ta stroba entre otro ehekushon di verediktonan di wesnan;

– Tambe frakshon KEM ta di akuerdo, ku e rekomendashon hasí na minister di hustisia, señor mr. Shalten Hato, pa hisa esaki na nivel di paisnan di Reino, pa tuma medidanan, pa ehekutá e medida di TBS. Mester traha indikashonnan di ehekushon, pa ponementu den un organisashon sikiátriko.

Detenshon:

– Pa loke ta e parti di detenshon Frakshon di KEM ta bisa ku SDKK ta konfrontá diferente punto problemátiko: no tin sufisiente personal, no tin propio sikólogonan i sikiaternan, falta formashon i training i falta un plan di perspektiva i guia personal. Mester basha SDKK abou i konstruí un prizon nobo, moderno, ku ta kumpli ku reglanan internashonal di prison;

– Partido KEM ta lamentá, ku ainda no tin liña di instrukshon trahá, pa ehekutá medida di ponementu di prezunan, den un organisashon sikiátriko. Kem ta kere ku mester buska i pone ekiponan disponibel, na momento di ehekutá veredikto(nan). Esaki mester tuma lugá lihé, pa medio e ministernan di GMN i esun di Hustisia. Esaki no ta aseptabel mas, despues ku esaki a ser konstatá na 2014(promé rapòrt) i awe 9 aña despues, ainda no a atendé/solushoná esaki;

– Frakshon KEM a konstatá, ku tin un palabrashon entre SDKK i Ministerio Públiko, pa reservá 10 sèl den SDKK, pa vrije voeters.