Back to Top
Responsive image
E korant di pueblo

Kenji Gorré lo pasa di Portugal pa Polonia


May 25, 2021 • 2 minüt pa lesa

PORTUGAL—Tur kos ta indiká ku e futbolista, mediokampista ofensivo di e selekshon di futbòl di Kòrsou, Kenji Gorré, lo bai hasi un transferensia próksimamente.

Un ke otro unda ku tur kos ta indiká, ku despues di tabata parti di e ekipo di Nacional den Primeira Liga di futbòl na Portugal, ku pa temporada benidero, lo e bai ta aktivo den futbòl na Polonia. Esaki unda ku Kenji Gorré lo bai ta den akshon pa e ekipo di Wisla Krakow.

E futbolista di 26 aña di edat, kende ta yu di e tékniko di e selekshon nashonal di Sürnam i eks futbolista profeshonal Dean Gorré, a nase na Spijkenisse na Hulanda. Seguidamente debí ku su tata mester a bai Inglatera pa futbòl, Kenji a move for di chikí pa Inglatera, unda e la lanta i a inisiá su karera futbolístiko.

Entre otro e la logra pa tabata den akshon ku e ekiponan hubenil di e organisashonnan di Manchester City i Manchester United. Durante di e periodo di aña 2013 te ku 2018, Kenji tabatin kontrato ku e ekipo di Swansea City, unda e la keda di hür ku entre otro ADO Den Haag i tambe Northampton.

Finalmente tabata durante di e último 3 temporadanan, ku Gorre tabatin kombenio na Madeira, ku a nifiká ku kada 2 siman, e tabata huntu ku su demas kompañeronan di ekipo abordo di un avion, pa asina biaha pa hunga komo bishitante. Tabata periodo tambe ku e la wòrdu di hür ku GD Estoril Praia.

Kenji a hunga 29 wega pa Nacional e temporada aki, unda e la anotá na 4 okashon i tabatin 3 asistensia, unda finalmente su ekipo a degradá, despues di a keda den sotano, komo number 18 i asina lo hunga temporada benidero, den di 2 divishon na Portugal.

Miéntras tantu prensa na Portugal a indiká, ku e ekipo di Wisla Krakow tabatin un temporada desepshonante tras di lomba, unda ku e ekipo ku ta 13 biaha kampion, a finalisá na di 13 puesto den e kompetensia Ekstraklasa na Polonia.

Buskando refuerso, dirigentenan di e ekipo, tin un kontrato pa 3 temporada, ku opshon pa un di 4, kla pa Gorré.

Login