Promé minister, Gilmar “Pik” Pisas, risibiendo e resultadonan di e investigashon.
Piscadera,– Resien ministerio di OWCS a publiká nan investigashon tokante kon pa promové igualdat den enseñansa. E ministerio a enkargá SEO Economisch Onderzoek huntu ku Universidat di Kòrsou (UoC) i Universidat di Amsterdam pa hasi e investigashon. E resultadonan a keda publiká durante un simposio na Banko Sentral kaminda ta vários punto interesante a bini dilanti.
Demas investigashon di e organisashon nan ariba menshoná a konfirmá vários reklamo ku ya tabata move den pueblo kaba. E investigashon a konfirmá ku tin un skarsedat di dosente, tin skolnan ku ta selektivo riba selekshon di alumnonan ku ta drenta e skol di fundeshi. Tambe e investigashon a bolbe konfirmá ku e materialnan di lès no ta sufisiente adekuá pa e alumno lokal. Mas aleu, a sali na kla ku tin diferensha den kalidat entre e skolnan. I tambe tin skol ku no tin sufisiente fasilidat básiko.
Ta asina ku e relato ku OWCS a entregá ta elaborá riba diferente akshon di prioridat ku por keda implementá kaminda e drèmpel pa implementashon ta relativamente abou. E akshon nan aki a wòrdu kategorisá komo e 10 akshon nan di prioridat kual lo dura por lo máksimo 48 luna di trabou. Tambe a determiná akshon nan riba término medio i akshon nan riba término largu kual huntu ku sòru ku tur alumno tin mesun chèns na Kòrsou pa risibí e mesun kalidat di enseñansa.
E ekspertonan a kalkulá ku e gastunan riba término kòrtiku lo kosta alrededor di 10 mion florin repartí entre 4 aña. Kaminda tambe mester tene kuenta ku un gastu anual di 100 mil florin. 7 di e 10 akshon nan di prioridat tampoko no tin gastunan struktural. Pues e 7 akshon nan por keda ehekutá ku e presupuesto aktual mes. Tambe a sali na kla ku 8 di e 10 akshon nan di prioridat no mester bini ningun adaptashon di lei. Kual riba su turno ta nifiká ku e drèmpel di implementashon ta keda relativamente abou.
E akshon nan di prioridat ta inkluí ku mester sòru ku tin sufisiente fasilidat básiko inkluyendo sistemanan di èrko. Esaki lo sòru ku tur alumno lo por konsentrá muchu mas mihó. Tambe ta rekomendabel pa adaptá evaluá e sistema aktual pa finansiá enseñansa. Mas aleu a enfatisá ku mester oumentá e eksigensianan di dosentenan den enseñansa spesial, pa asina sòru ku e personal aki tin sufisiente konosementu pa e material. Tambe a buta komo punto di akshon pa oumentá e dominio di Hulandes òf otro lenguahe.
E último 6 akshon nan ta inkluí desaroyá mas estudio pa lidernan eskolar i buta mas eksigensia pa e lidernan mantené un nivel adekuá di kalidat. Adaptá e sistema aktual tokante konseho pa bai skol sekundario, stimulá “formatief toetsen”, organisá eventonan ku otro sektornan pafó di enseñansa pa asina por amplia igualdat den enseñansa, stimulá e bestürnan eskolar pa bini kureglanan di tarea di kas adekuá i finalmente usa e konosementu aktual den enseñansa riba tur nivel.
Segun e investigashon, den su totalidat a determiná 26 akshon ku lo elevá igualdat den nos enseñansa. Pero na momentu ku agregá e kriterianan di urgensia, impakto, chèns pa logra, viabilidat i aspekto finansiero, e akshon nan ariba menshoná ta bini dilanti.