Back to Top
Vigilante banner image

Klein Kòrsou tabatin kachó di awa


September 20, 2022 • 1 minüt pa lesa

E kachó di awa, Caribbean Monk Seal, ku tabata habitá nos awanan teritorial den siglo 17.

Willemstad,– Segun vários informashon Klein Kòrsou tabatin un poblashon di kachó di awa ku lamentablemente for di 1954 no ta eksistí mas.

E kachó di awa konosí komo “Caribbean monk Seal” tabata e úniko rasa di kachó di awa ku tabata habitá den e region karibense. Banda di Klein Kòrsou, otro islanan ku tabata tin un poblashon di e kachó di awa tabata entre otro, Jamaica, Bahamas, Cuba i vários isla mas chikí den nos region.

Por nota klaramente ku e poblashon karibense di e Caribbean Monk Seal a kuminsá redusí ku desaroyo di e poblashon di humanidat. Segun vários investigashon, e kueru di e kachó di awa aki tabata riku na zeta ku tabata wòrdu usá pa lubriká mashin di agrikultura. Tambe e zeta tabata wòrdu usá komo kombustibel den lampi di lus. For di siglo 17 paisnan oropeo tabata jag riba forma komersial riba e kachó di awa pa su zeta di kueru. Alabes ta den e mesun periodo aki Hulandesnan tabata bai Klein Kòrsou pa asina jag riba e kachónan di awa.

For di siglo 19 ya kaba sientífikonan a kuminsá nota ku e kachó di awa, “Caribbean Monk Seal”, tabata birando skars indikando ku e yagmentu komersial a finalisá. E último opservashon konfiabel di e kachó di awa aki tabata na 1954 i na 1996 sientífikonan a determiná ku e rasa di kachó di awa Caribbean Monk Seal ya no ta eksistí mas.

Login