Back to Top
Vigilante banner image

Komishon Enkuesta HNO tin te òktober pa saka rapòrt


May 28, 2024 • 2 minüt pa lesa

WILLEMSTAD – E Komishon Temporal Hòspital Nobo Otrobanda di Parlamento di Kòrsou (Komishon Enkuesta HNO) a pidi i haña mas tempu pa investigá. Pa mas tardá 14 di òktober e rapòrt ku resultadonan di nan investigashon mester ta kla.

E komishon a aserká Parlamento dia 23 di mei aña pasá ku e petishon pa prolongá su término i riba 7 di yüli di aña pasá, Parlamento a bai di akuerdo pa prolongá e término ku 1 aña, terminando riba 12 di ougùstùs awó. Finalmente Presidente di Parlamento a saka un desishon skirbí ayera, ku ta duna e komishon mas tempu. A prolongá e término te ku 14 di òktober awó i na final dje término akí, e investigashon dje Komishon di Enkuesta lo mester ta kla.

E komishon akí ta konsistí di miembronan di Parlamento Eduard Braam di frakshon di MFK (Presidente), Giselle Mc William di frakshon di MAN, Gwendell Mercelina di frakshon di PNP, Ana-Maria Pauletta di frakshon di PAR, Rennox Calmes di frakshon di TPK i Michelangelo Martines di frakshon di KEM.

E komishon ta determiná pa haña sa kon a tuma e desishonnan pa traha un hòspital nobo. E komishon lo studia dokumentonan i skucha esnan embolbí, pa haña sa e bèrdat tokante desishonnan tumá. Pa skucha opinion di komunidat a pone dos enkuentro públiko i tambe a lansa un enkuesta pa públiko.

Ketu bai ta relevante pa envestigá kon a tuma desishonnan, ora a disidí di konstruí un hòspital nobo na Otrobanda. For di 2018 un mayoria den Parlamento tabata opiná esaki. Miembronan di Parlamento e tempu ei a disidí e or’ei pa hasi uso di e derecho di investigashon (enkuesta). A lanta e komishon, ku a haña e tarea pa investigá 5 tópiko.

Ta trata entre otro e desishon pa traha e hòspital na un otro sitio. Tambe nan a buska pa sa kon a tuma e desishonnan den gobièrnu i e transishon di e hòspital bieu pa esun nobo. E komishon ta konsistí di e 6 miembronan di Parlamento menshoná i ta risibí sosten di un tim di spesialista. Tres sientífiko ta repasá tur e dokumentonan. Huntu ku e komishon, a disidí ken ta mester a skucha bou di huramentashon pa duna mas informashon.

Tin tambe un asina yama ‘klankbordgroep’, ku ta konsehá e komishon. E grupo akí ta konsistí di Arjan Vliegenthart (direktor di Nibud), Marcel Levi (presidente di NWO), Lodewijks Rogier (un eksperto riba tereno di lei) i Eline Altenburg-Van den Broek (ekonomista riba tereno di salubridat i epidemiólogo). A embolbí siudadanonan di Kòrsou tambe den e investigashon.

Ya komo ta ku plaka di pueblo a traha e hòspital, a duna oportunidat na komunidat pa ekspresá nan mes riba 2 di desèmber di aña pasá durante dos enkuentro. Tambe tabatin un enkuesta pa públiko kaminda komunidat por duna nan opinion tokante e trabou dje komishon. A skucha diferente polítiko i representante di instansianan tokante henter e proseso. Na òktober pueblo lo sa kiko ta e resultado dje enkuesta.

Login