Back to Top
Vigilante banner image

Komishon fiho VVRP ta bishitá Intertraffic Amsterdam 2022


April 6, 2022 • 2 minüt pa lesa

Komishon fiho di VVRP ta bishitá Intertraffic Amsterdam 2022.

Willemstad- Resientemente un delegashon di Parlamento a haña e oportunidat pa bishitá e èkspo di Intertraffic Amsterdam 2022.

Esaki tabata un eksposishon kaminda mas òf ménos 800 empresa i organisashon a presentá teknologia nobo den mobilidat, tráfiko i transporte. E delegashon di Kòrsou a konsistí di e komishon fiho di VVRP di Parlamento i tambe e ekspertonan di e ministerio di VVRP huntu ku Minister Cooper. E delegashon kombiná di legisladó, eksperto i mandatario a mustra di ta di balor agregá.

Mirando ku mesora por a diskutí e diferente puntonan di atenshon, den e konteksto di Kòrsou i for di diferente ángulo. Puntonan manera nos klima, e materialnan ku nos ta produsí lokalmente i legislashon aktual i leinan ku falta ainda

Un punto ku a keda ratifiká durante e bishita aki ta e echo ku nos legislashon pa ku transporte i tráfiko ta super antikuá, lokual ta difikultá e uso di teknologianan mas moderno. Un ehèmpel di esaki ta e legislashon pa registrá plachi number; e ta un punto di atenshon, ku mester traha riba dje di forma urgente. Ku e legislashon aki, por hasi uso di un kantidat di ‘software’ ku por fasilitá mobilidat i hasi nos tráfiko mas sigur.

Parlamentario Ana Maria Pauletta ta konvensí ku mobilidat ta parti esensial pa ku desaroyo di e siudadano. Ademas di ku e siudadano por yega di punto A pa punto B di un forma efisiente, aksesibel i pagabel; un sistema di mobilidat adaptá na e nesesidat di e siudadano por tin efektonan sosioekonómiko na benefisio di e siudadano.. Paisnan bisiña a demostrá ku éksito ku mehorashon di un sistema di mobilidat antikuá ta mehorá e kalidat i nivel di bida di e siudadano. Ademas uso di ‘appnan’ moderno ku por yuda garantisá seguridat di tráfiko por keda implementá na Kòrsou tambe.

Na 2019 Parlamento a dekretá transporte komo un área den krísis i realmente nos mester ban kuminsá duna esaki kontenido.

Den kuadro di esaki, miembronan di e delegashon a indiká di na regreso lo reuní inmediatamente pa evaluá i tambe formalisá plannan di akshon. Lokual si ta mas ku kla, ta ku si logra mehorashon di mobilidat, nos lo por hasi esaki trahando solamente huntu ku tur stakeholder.

Login