Desishon: Hunta di Minister mester tuma un desishon riba dos alternativa pa problema di Ennia.

Punda—Hunta di Minister, mester tuma un desishon riba e futuro di penshonadonan Ennia. Konforme un sugerensha di Komishon Resolushon Ennia tin dos senario riba mesa pa atendé e problemátika di Ennia.

E komishon instalá tin ekspertonan internashonal  sostené pa Delloitte & Touche huntu ku aktuario internashonal Phenox. Nan a yega na dos senario. Sea ta “run off” Ennia Caribe Leven of ta hasi un Kontinuashon Nobo, pa lora skapa e empresa di seguro mas grandi riba teritorio ulandes den Karibe. E desishon ta den man di Kabinete Pisas. Manera ta konosí, pa yüni próksimo Korte di Apelashon mester tuma un di dos desishon den kaso Ennia, riba un claim di kasi 1.1 bon florin ku Ennia i Banko Sentral a imponé riba grupo Ansary. Apesar di intentonan di korte pa partidonan yega na otro pafó di korte, no a logra yega na un entendimentu. Pendiente e desishon di korte, e Komishon Resolushon Ennia a yega na dos konseho, kual sea fo’i saku robes òf esun règts, e yu di Kòrsou mester bai paga.

Ta trata di dos senario proponé. E promé senario ta konsehá pa “run off”, Ennia Caribe Leven. Práktikamente esei ta nifiká pa sera e fondo di penshun i buska solushon alternativo. Miéntras ta serando e obligashonnan, ta sigui manehá e pólisa nan aktual. E solushon ta dirigí solamente pa kumplimentu na e obligashonnan a korto plaso di tenedónan di pólisa riba seguro di bida. Mensualmente Ennia ta pagando algu mas ku 4 mion florin mensual na tenedónan di pólisa riba nan kota mensual di penshun. Tantu e senario di “run off” komo esun di kontinuashon, no a tene kuenta riba e desishon di korte si Ansary mester paga òf no. Probablemente e kaso ei lo tuma mas ku 2 aña mas pa resolvé, si skohe e direkshon di kasashon pendiente e desishon na Yüni próksimo.

Den e senario di “run off”, ta kalkulá ku tenedónan di pólisa ta bai pèrdè mas ku 80% di nan derechinan riba penshun. E deskuento ta basá riba e situashon finansiero aktual na Ennia. Den e senario di Run Off, mester tene kuenta alabes ku e deskuento ku mester bini si akaso opta pa bende e aktivo (balorá na bolsa di penshun) i na kua preis esaki ta keda negoshá. Lokual e komishon ta splikando ta ku mas deskuento duna riba e balor di e bolsa mas atraktivo e ta bira pa kumpradónan, pero e tenedó e polisial su balor ta baha konsiderablemente. Den e senario di Run Off, gobièrnu di Kòrsou su kontribushon ta bira por lo ménos 1.2 miar florin repartí riba 25 aña. Ekspertonan ta kalkulá un peso di likides di por lo ménos 50 mion anual. No ta spesifiká si esaki ta inkluso interes.

E senario di Kontinuashon ta mas kompliká pero ku ménos konsekuensha, anke komunidat tei paga den e senario tambe. Pa kontinuá ku Ennia, e taha desaroyonan negativo, ekspertonan ta kalkulá un nesesidat di 700 mion florin na invershon. (atrobe no a konsiderá e claim di 1.1 miar riba grupo Ansary). E senario di Kontinuashon, manera menshoná ta mihó pero alabes mas kompliká pa ehekutá. Ta trata di un kombinashon na faktor pa yega na faktibilidat riba kontinuashon i bou di kua kondishonnan por invertí kapital nobo den Ennia.

Ekspertonan ta rekomendá pa introdusí un Fondo di Solidaridat pa Ennia (Leven). E Fondo di Solidaridat ta fungi komo un fondo di garantia den kasonan emergensia pa Ennia tin un fondo standby. E Fondo ta protehá komunidat di Kòrsou di no karga e kostonan i konsekuenshanan. Pa por yega na e fondo, mester bai fia riba merkado di kapital, mas ingreso den sektor finansiero (konsumidó tei paga), uza parti di reservanan nashonal depositá na Banko Sentral i depositá dividendo di Banko Sentral den e fondo.

Tur e dos senarionan menshoná ta riba mesa i proponé na Hunta di Minister pa tuma un desishon.