Back to Top
Vigilante banner image

Kompania den haf Vlissingen lo sera un aña pa sospecho trafikashon droga


July 10, 2024 • 1 minüt pa lesa

VLISSINGEN—E kompania di transborde Bulk Terminal Zeeland (BTZ) na Vlissingen lo keda sera pa un aña for di otro luna.

Asina alkalde Tillaar a anunsia. E kompania posiblemente lo ta partisipá den trafikashon di droga organisá internashonal pa un tempu kaba. Segun e alkalde ta probabel ku durante años lotenan grandi di entre 100 pa 1500 kilo di kokaina tabata riba e tereno. Ta kuestionabel ku un kompania den nos haf a keda konsientemente usa pa trafikashon internashonal di droga.  Investigashon di polis a indiká ku e kompania ta fungi komo kapa ku envolvimentu direkto di gerensia. Dos luna pasa e tres direktornan di e kompania a keda detené riba sospecho di kontrabanda di kokaina, falsifikashon di dokumento i partisipashon na un organisashon kriminal. Tin un investigashon penal ta kana riba e kaso. E direktornan ainda ta enkarselá, segun Omroep Zeeland. E kompania tabata habrí pero lo sera for di 24 yuli. E alkalde ta konsiente ku seramentu di e kompania ta afekta e personal i nan famia. Pero e seriedat di e praktikanan ilegal ta pisa mas, segun e alkalde. Ku e medida e alkalde kier manda un señal na e sirkulo di droga envolví. No ta tolerá maluso di nos haf. E ta spera ku lo bini trankilidat na e kompania i lo papia ku kompania den haf North Sea Port riba maneranan pa preveni ripitishon. BTZ ta un kompania di transborde na Vlissingen ku ta pasa merkansia pa transportenan manera di barku pa truk di karga. E kompania tin 22 hectare di tereno riba haf. Den 2021 tambe e kompania tabata den kontroversia i mester a move 55.000 tonelada pa falta di permit. Korte a duna e kompania un but di 250.000 euro.

Login