Back to Top
Vigilante banner image

Kompania di bentana i porta mester paga kliente su plaka bèk


April 30, 2022 • 2 minüt pa lesa

WILLEMSTAD – Korte a disidí siman pasá ku e kompania Island’s Best Windows and Doors International BV, tin ku paga un dama su plaka bèk ku e la paga na produktonan ku el a bestèl, sin nunka a risibí esakinan.

E kaso a keda tratá siman pasá mes den Korte Sivil, ku a dikta sentensia siguiente dia. E kompania no a presentá, ni no a manda un abogado. Tabatin un informante si presente, pero e la a para ariba di no ta representando e kompania. E la indiká tambe na Korte di no ta outorisá pa representá e otro kompania ruman.

Ta trata aki di un kontrakt ku e dama a sera ku e kompania riba 30 di mei 2020, tokante fabrikashon i instalashon di 13 bentana i un porta di garashi. E dama a paga 15 mil florin den 6 pago. E mester a risibí su bentananan i porta denter di 2 pa 4 luna, kemen pa mas tardá 30 di sèptèmber 2020.

Un miembro di direktiva dje kompania a primintí na komienso di mart aña pasá ku e lo haña su bentananan i porta pa mas tardá 7 di aprel 2021. Pero nada. Den un karta di 6 di yüli aña pasá, e ora ei e dama a kibra e kontrakt pafó di Korte gewon riba su mes, paso e no a haña su produktonan kumprá.

Ela bai Korte ku e kompania e ora ei i a pidi Korte pa ofishalmente kibra e kontrakt i pa ordená e kompania pagué bèk su 15 mil florin, más interes i ademas pago di tur gastu tambe relashoná ku henter e kaso aki. E dama a eksihí tambe un suma di 750 florin pa daño perhuisio, más interes, pa gastunan hasí di investigashon.

E kompania no a keda representá pa niun hende i porlotantu no por a refutá e ponenshanan aki. Korte a bai di akuerdo ku e petishon. Segun Korte e echo ku e dama mes a kibra e kontrakt promé, pafó di Korte lo tin peso den un asina yamá bodemprocedure. Esaki ta un prosedura largu den kua Korte ta tuma tur tempu nesesario pa investigá tur kos. Kemen ya Korte ta asumí ku e dama lo haña rason di a kibra e kontrakt durante e bodemprocedure.

Echo ta ku riba 12 di yüli 2021, ainda e bentananan ni e porta di garashi no tabata entregá ni instalá. P’esei Korte a disidí ku e kontrakt ta kibrá i ku tur servisio ku e kompania a hasi kaba pa por kumpli ku e kontrakt, mester keda anulá.

E kompania mester paga e 15 mil florin bèk, más interes. Tambe e kompania mester paga 1500 florin na gastunan ku e dama mester a hasi pafó di Korte pa kibra e kontrakt. E dama tin ku haña 750 florin na pago di daño perhuisio tambe, paso e kompania no tabatei presente durante tratamentu pa refutá esaki tampoko. I komo e partido pèrdèdó e kompania mester paga tambe tur gastu di Korte ku ta un total di algu mas di 2 mil florin.

E kompania aki no ta registrá na Kámara di Komèrsio. Riba nan website, nan tin un lugá situá na F.D. Rooseveltweg, i un adrès na Aruba.

Login