E kompanianan Trust kier un reunion urgente ku minister Silvania i GCB.

Willemstad—Durante di un enkuentro djaluna 20 di mart 2023 Kompanianan di Trust, aktivo den e sektor di weganan di hazar riba internèt “Online Gaming”, a ekspresá nan intenshon di uni.

Espektativa ta ku den e simannan benidero lo inkorporá e asosiashon pa ku esaki i lo elegí su direktiva. E meta di e asosiashon ta pa e sektor presentá di un forma konhunto i uní. Kompanianan di Trust ta enfatisá nesesidat pa renobashon di leinan i proseduranan, komo tambe supervishon pa ku e sektor di Online Gaming. Tambe nan ke kolaborá ku gobièrnu, en partikular ku minister Silvania, pa fasilitá mas pronto posibel introdukshon di lei(nan) nobo. Kompanianan di Trust ta representá mayoria kompania di Online Gaming establesí na Kòrsou, pa e motibu aki kompanianan di Trust ta un parti indispensabel di e industria di Online Gaming. Kompanianan di Trust tin e konosementu i eksperiensia nesesario pa por duna un aporte pa ku e trajektorio di e lei(nan) aki ku meta prinsipal pa mantené kompanianan i kuponan direkto i indirekto di trabou i tambe atraé kompanianan nobo. Adishonalmente, kompanianan di Trust ta indiká di lo laga hasi mas pronto posibel un estudio independiente di faktibildat (“haalbaarheidsonderzoek”) di posibel konsekuenshanan ku e proposishonnan ku tin aktualmente di e “Landsverordening Op De Kansspelen” – “LOK” por tin. E espektativa ta ku e resultado di esaki lo yuda sostené proposishonnan ya postulá dor di e kompanian di Trust. Finalmente kompanianan di Trust ta hasi un yamado di urgensha pa ku e situashon aktual di e lisensiatarionan, referí komo “Master License Holders”. Den e sistema aktual e Master License Holders tin un ròl krusial den operashon di e sektor di Online Gaming. Kompanianan di Trust ta urgi pa bini ku un transishon organisá di e sistema eksistente pa esun nobo. Esaki ta enserá ku mas pronto posibel mester bini klaridat tokante renobashon di lisensianan di Master License Holders ku lo kaduká den e di tres i di kuater kuartal di 2023. Den kaso ku esakinan no wòrdu renobá na tempu, e sub[1]lisensianan otorgá na kompanianan establesí na Kòrsou tambe lo kaduká; esaki lo kausa un daño enorme pa henter e sektor. Pa limitá posibel konsekuensha negativo kompanianan di Trust ke urgi minister Silvania i tambe Gaming Control Board pa eliminá e insiguridat eksistente serka e kompanianan di Online Gaming dor di renobá e lisensianan di e Master License Holders lo mas pronto posibel, preferiblemente no mas tarda ku fin di April 2023.