Back to Top
Responsive image
E korant di pueblo

Komparashon preis di 118 produkto den 31 botika


September 24, 2021 • 3 minüt pa lesa

Willemstad,—Durante e periodo di 3 te ku 8 di sèptèmber 2021, Fundashon pa Konsumidó a anotá preis di produktonan ku mas ta wòrdu kumprá pa nos konsumidónan den botikanan aki na Kòrsou. Saliendo for di e punto di bista ku e konsumidó di awendia mester ta aun mas krítiko, alerta, responsabel i konsiente, Fundashon pa Konsumidó su meta primordial pa ku e komparashon di preis aki ta, pa yuda e konsumidó den su proseso di hasi un eskoho konsiente.   

Fundashon pa Konsumidó a bishitá 31 diferente botika i a anotá preis di 118 produkto, repartí den diferente kategoria. E kategorianan aki ta: tapa boka, ‘handsanitizer’, awa pa higiena pa boka, djèl pa baña kuné, pasta di djente, ‘dental floss’, habon pa baña, puiru, deodorante, toaya femenino, pomada, krema pa kurpa, shampo/ ‘conditioner’, ‘relaxer’ pa kabei, pintura i krema pa kabei, katuna, ‘nail polish remover’, zalf pa kurpa,‘ facial cleansing’, krema pa feita i ‘splash lotion’.

Botika NOVO esun di mas barata.

Basá riba e 118 produktonan ku a keda anotá, Botika NOVO a resultá e botika ku na momentu di e anotashon di preis tabatin mas produkto na un preis mas ekonómiko, kompará ku sobrá botikanan. Botika NOVO tabatin un kantidat di 35 produkto na e mihó preis for di e 118 produktonan. E di dos botika ku preis mas ekonómiko a resultá botika Cerito, ku un kantidat di 34 produkto. E di tres botika mas barata ta botika Groot Piscadera, ku 22 produkto.

Botika mihó surtí

Pa loke ta surtido, botika Groot Piscadera a resultá esun mihó surtí ku un kantidat di 76 produkto di e 118 produktonan ku nos a preselektá. Botika Cerito, Mahaai i Tera Kòrá ta na di dos lugá ku 74 produkto i botika Nos Deseo na di tres lugá ku 73 produkto.

Diferensia di preis

Fundashon pa Konsumidó a konstatá un diferensia di preis notabel entre algun produkto. Por ehèmpel un bòter di Listerine Cool Mint di 500ml ta kosta na botika NOVO, Cerito i Groot Piscadera fl. 8.99. E mesun produkto aki ta kosta fl. 18.72  na botika Dominguito, kual ta un diferensia di fl. 9.73.

Tapa boka a bira un di e produktonan esensial den e tempu di awor. Netamente pa e motibu aki ta ideal pa bo tin un bista unda ta kumbiní bo kumpra esaki. Pa loke ta trata kaha di tapa boka di 50 pida, nos a tuma nota di un diferensianan di preis di fl. 31.57 i fl. 32.11. Teniendo na kuenta ku tin diferente tipo di tapa boka riba merkado, ta nifiká tambe ku tin diferente preis riba merkado. Pa e motibu aki Fundashon pa Konsumidó ta konsehá pa ora ta kumpra produktonan di prevenshon di Covid-19, analisá preis, kalidat i kantidat i kompará esakinan pa asina evaluá si ta kumbiní kumpra e produkto en kuestion. Un otro ehempel di diferensia di preis bou di produktonan di prevenshon kontra Covid-19 ta den e kategoria di ‘Handsanitizer’. Un ‘handsanitizer’ di 887ml di e marka Curaloë ta kosta fl.4.00 na Botika Gosie i na Groot Piscadera esaki ta kosta fl.10.59, kual ta un diferensia di fl. 6.59.

Asina tin un kantidat di diferensianan di preis mas, prinsipalmente debí ku aki ta trata produktonan ku no ta mará na un preis máksimo stipulá dor di Gobièrnu. Netamente pa e motibu aki Fundashon pa Konsumidó ke enkurashá nos konsumidónan pa evaluá preisnan bon di forma ku nan por hasi kompra konsiente i responsabel.Tene na kuenta ku botikanan tambe sa tin huki ku produktonan den oferta, kual tambe por pone den konsiderashon na momentu di kompra.

Pa mas informashon tokante di komparashon di preis di produktonan di botika i otro informashon relashoná ku derechinan di konsumidó por bishitá nos wèpsait www.fundashonpakonsumido.org òf bèl nos na 462-6666

Login