Apertura ofisial di e edifisio tabata bon bishitá.

Willemstad,– E edifisio na Montaña konosí komo “Hit 100.3FM” ya pa dos aña ta den e proseso di restourá i ayera tabata tin e apertura ofisial.

E dia a inisiá ku un sirbishi den oranan di mainta dor di iglesia “Bida Nobo”. Ya pa kasi dos aña e iglesia, iglesia Bida Nobo, ta manehá e edifisio ku meta pa transformá esaki den un sentro di bario kaminda tur persona den serkania por disfrutá di dje. Aparte ku tur atardi hende sa hasi deporte riba e lugá di stashoná outo, aworakí tur hende tin posibilidat pa hür salanan den e edifisio pa proyektonan positivo.

Segun Elix Faries kende ta manehá e fasilidatnan di e edifisio ta importante pa nos konsentrá nos mes riba deporte, kultura, edukashon, formashon spiritual, músika i drama. Segun Faries, tur e kosnan aki ta importante pa nos muchanan por desaroyá nan mes. Ademas e edifisio aki mester fungi komo un “vuurtoren”pa tur organisashon ku ke traha riba un mihó futuro. Tambe durante e apertura a para ketu ku e meta di e edifisio ta pa traha un mihó hende pa mañan. Esaki segun Elix Faries mester kuminsá serka nos muchanan.

Durante un splikashon di e edifisio por nota ku e fasilidatnan ta den bon estado. Tantu den e sala grandi komo e sala chikí ta bon mantené, pues e edifisio aki ta perfekto pa duna kurso i otro aktividatnan positivo. Tambe tin un bon bientu ta krusa den e edifisio. Pues e edifisio ku tur su salanan ta perfekto pa organisashon di aktividat. E meta di e sala ta multifunshonal i ta brinda servisio pa aktividatnan sosial, deportivo edukativo i di entrenamentu pa tantu empresanan komo partikular. E sala tin un kapasidat pa akapará 250 hende.

Por tuma kontakto riba: +5999 525-6089 òf +5999 528-8010