800 mil: ta sospecha 800 mil na froude den PSB Bank.

Punda—Un investigashon interno na PSB Bank ta riba un posibel pista di froude via dje sistema di Pagafasil ku por yega un suma di 800 mil florin. Esaki ta lokual fuentenan den seno di APC Bank, e akshonista mayó di PSB Bank a revelá na Vigilante. Entrante e siman aki, sr. Oswin Leonora a bira CEO di PSB Bank

Ayera den transkurso di atardi a sirkulá un komunikado unda a anunsiá ku 4 empleado na e banko a wòrdu pon’é riba non aktif, for di kual 3 ta den posishon ehekutivo miéntras un empleada na e departamentu di finansas tambe a wòrdu mandá kas pendiente un investigashon interno na e banko. Ta trata di e Direktor Finansiero G.W., Operations Manager, C.L. un funshonario den departamento di finansas,  S.F.,  miéntras un hefe di finansas tambe ta riba non aktif. Tin vershon tambe ku un otro empleada na un kompania priva riba Churchillweg tambe ta den problema na trabou.

Detayenan di e kaso ta indikando froude den forma di “Floating” di e sistema di pagamentu via Pagafasil. A bin deskubrí e froude despues ku e empleado na PSB Bank, S.F. kende ta prosesá e pagonan di Pagafasil a kuminsá indiká di ta gastando sèn i segun e sistema bankario kuminsá hasi un chekeo di krédito (Credit Check) na diferente instituto finansiero unda a deskubrí ku e no tabatin fiansa otro kaminda. Durante un interogashon a deskubrí iregularidat den su deklarashonnan unda a puntr’é diferente pregunta riba su gastamentu i fuente di entrada.

 Pa por finalisá e investigashon, a pone e kuater empleadonan riba non aktif pendiente resultado. E CFO, G.W. ta keda responsabel pa no a ehersé e kontròlnan konforme Bon Maneho miéntras ku e Operations Manager C.L.,  tambe a keda kalifiká komo outoridat responsabel huntu ku e hefe di finansas. Informashonnan preliminar ta señalá ku S.F. huntu ku un empleada na un negoshi riba Churchillweg, propiedat di un komersiante di fam Z, tabata manipulá ku e pagonan ku pasa bia Pagfasil. Indirektamente tabata uza e sènnan entre nan dos i “float” lagando kuentanan di pago habrí. Despues ta uza pago di otro kliente pa sera e kuenta habri di otro kliente ku si a paga.

Abase di e hechonan i deskubrimentu, APC Bank a nombra Leonora temporalmente pa ehersé e funshon di CEO na PSB i tuma akshon. APC Bank, e akshonista mayó den PSB Bank, a bin deskubrí mal atministrashon den e sistema i mesora a ordená pa pone esnan responsabel pa ehekushon i kòntròl riba non aktif. Manera menshoná, ta sospecha e froude di ta riba 800 mil florin i tabata un proseso di “float” tumando lugá pa algun aña kaba. Siman pasá, empleadonan a keda informá Oswin Leonora a keda apuntá pa APC Bank pa tuma maneho dje banko over.