Komunidat internashonal a keda sakudí ku resultadonan registrá i publiká.

CARACAS – E mayoria di e komunidat internashonal a eksigí pa outoridatnan venezolano hasi un rekuento den transparensia di e elekshonnan presidensial selebrá den oranan di djadumingu último. Ta trata aki di elekshonnan den kua, kontrolá pa chavismo, a atribuí viktoria na e presidente di e pais, Nicolas Maduro, ku un 51% di e voto nan.

Estádos Unídos, Union Oropeo i mayoria di e pais man latino amerikano a mustra nan mes preokupá pa e situashon i a reklamá klaridat i tambe pa publiká tur e aktonan elektoral pa asina por verifiká e resultado nan ku a duna Maduro komo ganadó. Di otro banda, Maduro a keda felisitá pa Rusia, Iran i China.

Maduro, na poder for di 2013, a optené e 51.20% di e voto nan, miéntras ku e kandidato opositor Edmundo Gonzalez Urrutia, a haña 44.20. Tur esaki segun e promé boletin spesial ofisial, presentá pa e Consejo Nacional Electoral.

E Atministrashon di e presidente estadounidense, Joe Biden, tin preokupashonnan serio pa ku e resultado nan anunsiá, indikando ku esaki nan no ta reflehá e boluntat di e pueblo venezolano.

Di su banda, e sekretario di Estado estadounidense, Antony Blinken, a mustra su mes seriamente preokupá pa balides di e resultado nan anunsiá pa e komishon elektoral di Venezuela.

E gobièrnu nan di Uruguay, Argentina, Costa Rica, Ecuador, Guatemala, Panamá, Paraguay, Perú i Repúblika Dominikana, den un deklarashon konhunto emití, a manifestá nan preokupashon profundo pa e desaroyo di elekshonnan i ta eksigí un kòntròl kompletu di e resultado nan i ta pidi tambe un reunion urgente ku e Organisashon di Estadonan Amerikano.

E presidente chileno, Gabriel Boric, un di e figuranan mas destaká di Latinoamérika, a suprayá ku ta importante pa entregá e totalidat di e akta nan tantu na opservadó nan internashonal independiente komo oposishon. Miéntras ku esaki no tuma lugá, e lo apstené su mes na rekonosementu di e resultadonan.

E alto representante di Union Oropeo pa Asuntu nan di Eksterior, Josep Borrell, a afirmá ku ta super vital pa sigurá e transparensia total den proseso elektoral, inkluyendo e konteo detayá di e voto nan i akseso na e akta nan di votashon.

Tantu gobièrnu spañó, italiano, franses i tambe esun britániko a ekspresá nan preokupashon pa e alegashonnan di inseguridat den konteo di voto nan na Venezuela i ámbos a pidi pa publiká e resultado nan detayá pa asina garantisá transparensia.

Di otro banda, e presidente Mehikano, Andres Manuel Lopez Obrador, a indiká ku e lo rekonosé triunfo di Maduro den elekshonnan, den kaso ku Venezuela logra hasi un konteo di nobo i esaki keda garantisá i konfirmá. Esaki meskos ku e gobièrnu di Brasil.

Sinembargo, e gobièrnu di China, Rusia i Iran, serka na e régimen di Nicolas Maduro,  felisitá esaki pa e viktoria elektoral.