Un dje detenshon nan relashoná ku ladronisia di kabritu.

Willemstad,– Parlamentario Elvin Gerard a puntrá minister di Hustisia, Shalton Hato, ki stap su ministerio ta tumando pa redusí ladronisia di kabritu tantu na Bandariba komo na Bandabou.

Durante tratamentu di e presupuesto di gobièrnu, parlamentario Elvin Gerard(PNP) a habri su diskurso felistando tantu minister Hato komo èks-minister Girigorie, pa e tremendo trabou e último añanan den e aspekto di Hustisia. Segun Gerard, ántes den e área di pariba e region tabata pestá pa ladronisia den kas di ansiano nan i vehíkulonan konstantenan tabata wòrdu hòrtá i despues hañá den Dam Pretu.

Segun Gerard, aunke e situashon ta drechando e parlamentario a sigui rekòrdá Minister Hato ku ladronisia di kabritu no mester wòrdu balotá. Gerard a splika durante su diskurso ku kriadónan di bestia ta hinka demasiado energia den krio di kabritu. Unabes tur e energia a wòrdu invertí di un momentu òf otro e bestianan aki sa wòrdu hòrtá.

Tambe Gerard a splika ku 5 aña pasá OM a apuntá un fiskal spesífikamente pa traha riba ladronisia di koper. Esaki a kulminá ku apénas tin ladronisia di koper aktualmente. Segun e parlamentario, nos mester bai e mesun direkshon tokante ladronisia di kabritu pa asina eliminá ladronisia di bestia.

Kobertura ladronisia di kabritu
Den publikashon nan anterior por nota ku enbèrdat tabata tin diferente ladronisia di kabritu tantu na 2022 komo na 2021. Na Mei 2022 KPC a asta publiká un komunikado dunando atenshon na ladronisia di kabritu. Segun e komunikado na mei, Kuerpo Polisial ke alertá kriadónan di bestia i partikularmente esnan di kabritu, pa un posibel oumento di ladronisia di kabritu den diferente área aki na Kòrsou tantu na Banda ‘Riba pero tambe na Banda Bou.

Segun un análisis di publikashon nan anterior por nota ku 5 detenshon a kai e aña aki relashoná ku ladronisia di kabritu. 2 detenshon a tuma lugá na Yanüari kaminda e otro detenshon a tuma lugá na Yüli tras di lomba. Ámbos detenshon a sosodé den área di Hato/San Pedro.