DEN HAAG–E unifikashon di migrantenan ku permit a keda defendé atrobe ayera den Raad van State pa un abogado di gobièrnu.

El a bisa ku e areglo ta nesesario. Raad van State ta boga pa duna un desishon medio febrüari riba e medida ku a keda rechasá pa diferente hues i a keda suspendé pa sekretario di estado djamars. Sekretario di estado ta konfrontá ku verediktonan di korte, segun abogado. Pa e motibu aki el a haña mas praktiko pa suspende e regla na e momentunan aki, pa no preshona sektor hudisial. E medida ta parti di e akuerdo di asilo ku gabinete a firma den ougustus 2022 pa solushoná e krísis di asilo riba término korto. E medida a drenta na vigor 3 oktober 2022. Segun e medida famia di un migrante ku permit mester warda 6 luna mas promé drenta Hulanda. Esaki pasobra e migrante no tin kas. Den e tratamentu na Raad van State e pregunta sentral ta si e limitashon ta kontra lei nashonal i Oropeo. Tres abogado ta bisa ku si. Den Raad a trata tres kaso. E huesnan a determiná ku e famia mester drenta Hulanda mas pronto posibel, loke a sosode kaba. E regla a keda apliká riba 1780 famia, inkluso migrantenan ku ya tin kas, algun ku ta warda 15 luna kaba. Diferente korte a deklara e regla di gabinete komo ilegal, ku a pone sekretario estado bai apelashon serka Raad van State.