Minister di Hustisia Shalten Hato.

WILLEMSTAD – Mirando e urgensia i importansia pa mehorá i fortifiká e kadena hudisial pa e por funshoná mas efektivo na bienestar di nos komunidat, Minister di Hustisia Shalten Hato, durante e reunión di Konseho di Minister di djárason último, a logra pa Konseho di Minister bai di akuerdo pa habri vakaturanan na algun dje entidatnan vital den e kadena hudisial, manera Kuerpo Polisial Kòrsou (KPC), Sentro di Detenshon i Korekshon Kòrsou (SDKK) i Landsrecherche Curaçao (LrC).

“Minister Hato ta di opinión, ku pa por reforsá e kadena hudisial i aportá na realisashon dje trabou pa traha pa un komunidat mas sigur, mester amplia e kapasidat di personal den entre otro Kuerpo Polisial, SDKK i tambe na Landsrecherche. P’e motibu aki mes Minister Hato den e reunión di Konseho di Minister di djárason 18 di aprel 2023 a proponé su koleganan, pa bai di akuerdo ku habrimentu di vakatura na e entidatnan indiká. Esaki ta brinda e oportunidat pa próksimamente den konsulta ku mando dje diferente entidatnan aki, habri e vakaturanan. Pa loke ta trata Kuerpo Polisial, lo habri vakatura di manera ku pronto por duna inisio na formashon di hóbennan ku kier bira polis, pero alabes lo habri oportunidat pa tuma algún persona ku eksperiensha kaba den e trabou polisial.”

Konseho di Minister a bai di akuerdo pa habri vakatura na SDKK tambe, pa asina duna oportunidat na persona nan ku ke bira bewaker/personal di seguridat i forma parti di e instituto di e sentro di detenshon i korekshon. Manera indiká anteriormente, e kushina di SDKK lo bira operashonal i pa e motibu akí lo brinda oportunidat na kòkinan ku ta deseá drenta den servisio di SDKK pa asina kushiná pa e klientenan dje instituto. Tambe Minister Hato a para ketu na e importansha pa mantenshon di kuido di salú dje klientenan den SDKK, motibu pa kual lo habri oportunidat tambe pa tuma algún personal di kuido di salú pa asina fortifika e departamentu di kuido den SDKK.

Landsrecherche tambe ta un instituto vital ku minister Hato ta responsabel p’e. “E organisashon di Landsrecherche falta di sufisiente kapasidat p’asina por terminá kasonan ku ta bou di investigashon. Pa e motibu aki Minister Hato lo habri vakatura pa asina garantisa kontinuidat di investigashonnan den kasonan andando na Landsrecherche. Di e forma akí, Minister di Hustisia Hato ta demostrá ku e tin atenshon pa e situashon agudo pa yega na ampliashon dje kapasidat di personal na e diferente entidatnan den e kadena hudisial. Su enfoke ta riba un aserkamentu integral pa fortifiká kadena hudisial. Próksimamente lo amplia mas riba e diferente pasonan ku lo tuma pa sigui optimalisá e servisio ku kada un dje entidatnan den e kadena hudisial ta brinda, p’asina garantisá mantenshon di lei, orden públiko i seguridat di kada siudadano i tur esnan ku ta bishitá nos dushi pais.”