Kier pa Kòrsou bira miembro asosiá di CARICOM

WILLEMSTAD – Relashoná ku e konseho di e direktor di Directie Buitenlandse Betrekkingen (DBB) na fin di luna pasá tokante e miembresia asosiá di CARICOM, Konseho di Ministernan a bai di akuerdo siman pasá pa Kòrsou bira miembro.

DBB mester asumí i kompletá e negosiashonnan dje tratado tokante e miembresia asosiá na nòmber di Konseho di Ministernan. I tambe pidi CARICOM pa duna un indikashon di kuantu e kontribushon pa 2024 ta, pa por kuminsá reservá e suma ei riba e presupuesto pa aña di servisio 2024, ku e komprondementu ku Konseho di Ministernan lo disidí na su debido momentu tokante riba kua presupuesto lo asigná e suma.

E organisashon karibense Caribbean Community and Common Market (CARICOM) su meta ta mehorá relashonnan komersial i ekonómiko entre e diferente miembronan i kordiná i regulá e relashonnan akí. Integrashon di e aktividatnan ekonómiko tambe ta parti di CARICOM. A funda CARICOM na 1973, konsistiendo di 15 pais di kua 5 ta miembro asosiá i ocho ta miembro komo opservadó. E paisnan opservadó ta te ainda Kòrsou, Aruba, Sint Maarten, Venezuela, Colombia, México, Puerto Rico i República Dominicana.

Presidente di Sürnam Chan Santokhi ya a bisa aña pasá di lo sostené negosiashonnan ku mester hiba na e miembresia asosiá di Aruba, Kòrsou i Sint Maarten. Esei ela bisa durante un enkuentro ku gobièrnu dje paisnan na Paramaribo. Na kuminsamentu di 2022 CARICOM a disidí na sigui ku e proseso di negosiashon tokante e petishonnan dje paisnan akí pa bira miembro asosiá.

Santokhi a komprometé komo presidente di CARICOM pa duna sosten kompleto pa kuminsá e negosiashonnan mas pronto posibel. Ela enfatisá ku un koperashon por hasi ku por tende e paisnan mihó den foronan internashonal. Paso ta atrabes di solushonnan global tur pais mester logra e futuro ku nan ke. Asina por stimulá sektor di turismo atrabes dje koperashon ku paisnan den Karibe. Segun Santokhi, p’esaki lo mester di mas konekshon aéreo i marítimo. Ademas Karibe i Sürnam partikularmente por ta bon sosio den suministro di alimento.

Durante tratamentu di Presupuesto 2023 di Hulanda pa loke ta trata Relashonnan di Reino, miembro di Tweede Kamer Jorien Wuite di D66 a puntra si ‘associate member’ di CARICOM ta bon pa progreso di por ehèmpel un kolaborashon funshonal ekonónimo den region i ku e paisnan. Riba esaki Sekretario di Estado di Relashonnan di Reino Alexandra van Huffelen a kontestá ku Aruba, Kòrsou ni Sint Maarten no por bira miembro afiliá i aktivo di CARICOM komo paisnan separá denter di Reino.

Segun Van Huffelen, Statüt di Reino Hulandes ta otorgá e outorisashon pa sera tratadonan i bira miembro kompleto di organisashonnan internashonal eksklusivamente na Reino. “Di akuerdo ku e reglanan di atmishon di CARICOM si ta posibel pa e paisnan haña un miembresia asosiá. Esaki ta ofresé un bon alternativa pa mantené den liña dje ophetivo di CARICOM i asina promové un koperashon ekonómiko funshonal. Ta na e paisnan mes pa disidí esei.”