No tin sufisiente datos riba efikasia i seguridat di e bakuna di Moderna bou di muchanan pa asina e keda implementá na Hulanda i den Reino.

PUNDA- Konseho di salú na Hulanda a rechasá konseho pa implementá e bakuna di Moderna pa muchanan debí ku aun no tin sufisiente datos riba efikasia i seguridat di e bakuna pa muchanan.

Manera ya ta konosí e bakuna di Pfizer/BioNTech anteriormente a keda aprobá i implementá na Hulanda i e islanan den Reino pa suministro bou di muchanan.

Agensia di Medisina Oropeo (EMA) a aprobá e bakuna di Moderna pa muchanan entre 6 pa 11 aña na fin di febrüari. Sinembargo, Konseho di salú hulandes no ta haña ku tin sufisiente datos riba efikasia i seguridat di e bakuna di Moderna pa e grupo di muchanan aki i p’esei no ta konsiderá implementashon di e bakuna di Moderna unu nesesario.

Segun Konseho di salú e bakuna di Pfizer/BioNTech ku a keda aprobá promé pa muchanan entre 5 i 11 aña ta efektivo i seif. Ademas, tin sufisiente dósis disponibel di Pfizer pa bakuná e poblashon di muchanan na Hulanda i den Reino. Pa e motibu aki nan a rechasá pa Konsehá implementashon di Moderna.