Punda– Na luna di sèptèmber, Parlamento di Kòrsou a aprobá e lei Konseho Supremo Elektoral. E lei aki ta ankra legalmente independisashon i imparsialidat di Konseho Supremo Elektoral i ta un paso grandi den desaroyo di Kòrsou pa loke ta trata demokrasia di pais Kòrsou. Ku introdukshon di e lei aki, Konseho Supremo Elektoral ta kuminsá funshoná den un estilo nobo na bienestar di nos demokrasia.

Komo órgano ku ta funshoná independiente di gobièrnu, íntegro, konfiabel i transparente, Konseho Supremo Elektoral su empeño ta pa kontinuamente krea konsientisashon serka e siudadano, pa e ta mas konsiente di e proseso demokrátiko di Kòrsou. Konseho Supremo Elektoral tin e responsabilidat legal pa organisá henter e proseso elektoral i ehekushon korekto di e Reglamento Elektoral di Kòrsou, implementashon di e ordenansa ku ta regarda finansiamentu di agrupashon nan polítiko i alabes hasi empeño pa e siudadano ta mas konsiente di e proseso elektoral i duna un empuhe na demokrasia den su totalidat, miéntras ta engrandesé partisipashon aktivo di siudadanonan na e elekshon.

Un di e tareanan primordial di Konseho Supremo Elektoral esta di organisá henter e proseso di elekshon, ta na vigor na e momentu aki mirando ku na aña 2021 lo tin Elekshon pa Miembronan di Staten di Kòrsou. Fecha di elekshon pa miembronan di Parlamento lo ta djabièrnè 19 di mart 2021. Pa realisashon di elekshon 2021 tin algun fecha importante kual ta:

• 22 di desèmber 2020, Registro di votadó ta sera
• 21 di yanüari 2021, Entrega di Lista
• 30 i 31 di yanüari 2021, Sostenementu di Lista
• 19 di mart 2021, Elekshon Staten
• 24 di mart 2021, Reunion Públiko pa determiná resultado definitivo di elekshon

No opstante di hopi trabou di preparashon pa sigurá elekshon liber i sekreto, Konseho Supremo Elektoral ta konsiente tambe di e situashon di e pandemia Covid-19 na Kòrsou i e impakto ku esaki lo tin riba henter e proseso elektoral. Konseho Supremo Elektoral ta hasiendo su máksimo esfuerso pa orientá i prepará di forma korekto, pa asina sigurá un proseso elektoral ku ta kuadra, teniendo na kuenta e medidanan ku ta ser apliká den nos pais.  Na e momentu aki Konseho Supremo Elektoral ta den konsulta ku Task Force Covid-19 pa despues informá tantu Gobièrnu di Kòrsou, Parlamento di Kòrsou komo komunidat en general enkuanto medidanan i adaptashonnan ku Konseho Supremo Elektoral lo apliká.

A base di e informashon ku Konseho Supremo Elektoral a logra akumulá, Konseho Supremo Elektoral a formulá protokòlnan ku lo keda apliká durante di e proseso elektoral di 2021. E medidanan definitivo lo dependé di e desaroyonan rondó di e vírùs Covid-19 den e lunanan binidero i e medidanan di prekoushon di Gobièrnu pa sigui bringa esei. Mientrastantu, Konseho Supremo Elektoral ta sigui traha na bienestar di komunidat di Kòrsou pa prepará I ehekutá Elekshon di miembronan di Staten di Kòrsou na un manera íntegro, konfiabel i transparente.