Komo ku PDVSA no tei mas, a bini gastunan adishonal.

Willemstad-  Den un entrevista sostené ku Vigilante, CEO di Curoil, Jamil Lasten, a splika ku anteriormente Curoil tabata tin un kontrakt ku PDVSA kaminda tur produkto ku Curoil kumpra nan tabata haña esaki ku tur servisio inkluí kual tabata yuda tene e preis riba merkado tambe abou.

Pues esaki ta nifiká ku awor ku PDVSA no tei mas ta bin gastunan adishonal manera entre otro gastu pa uza un tanki i tambe e brantwer di refineria. Lasten ta splika ku RDK no por a karga e gastunan aki i ta pa e motibu ei gastunan di B3 a bini serka di e kombustibel.

LASTEN DEN PROGRAMA EKONOMIA VIGILANTE

Lasten ta splika ku si logra sera un kontrakt ku e operador nobo di refineria manera Curoil tabata tin un PDVSA lo tin produkto mesora pa komersialisá den region kual lo yuda karga e vishon di Curoil ku ta pa nan ta e proveédó di kombustibel preferí den Karibe. Na momentu ku bo tin produkto huntu ku un refineria lokal por sera un aliansa stratégiko kaminda Curoil por krese komo kompania. Curoil su meta ta pa yega na un kontrakt di forma di PDVSA plùs. Esaki ta enserá ku Curoil ke bira un partner stratégiko di e operador kaminda por yuda e operador komersialisá uzando e bon nòmber ku Curoil tin den region. Ku PDVSA Curoil no tabata tin e koperativa aki kaminda por a yuda nan generá mas entrada pa e refineria.

Segun Lasten ta bon pa suprayá ku Bureau Telecommunicatie en Post (BTP) ta esun ku ta hasi kálkulonan i a base di esaki Gobièrnu ta determiná e preis di kombustibel. Curoil ta kumpra e kombustibel riba merkado ku tin su gastunan mará na dje. si Kòrsou tin su propio refineria, normalmente, lo sali Curoil mas barata. Lasten ta splika ku esaki ta dependé di kon e refineria lo drai i e preis ku nan ta pone pa kubri nan gastunan.

Lasten a duna di konosé ku na momentu PDVSA a bai i Refineria di Kòrsou a sera, Curoil a realisá ku nan no por sigui hasi negoshi manera kustumber. Nan a kuminsá baha gastunan drástikamente dor di vris salarionan i baha gastunan operashonal kual ta sosodiendo ainda. Esaki a yuda Curoil pa pasa dor di e sla ku a bini na momentu ku Covid a presentá.

Lasten ta splika ku ora e temporada di Covid a yega  Curoil a kana dos trayekto. E promé tabata esun di refinansiamentu di fasilidatnan di krédito serka finansiadónan aki na Kòrsou. sinembargo Curoil no tabata sigur ku nan lo haña esaki. E di dos trayekto a fungi komo un plan B pa si e promé plan di refinansiamentu no funshoná. esaki a enserá ku Curoil a aserká Hulanda pa yudansa. Hulanda na su turno a manda CFT ku a bishitá Curoil pa algun dia. Huntu ku CFT a yega na e konklushon ku komo Curoil ya a pasa e trayekto di baha gastunan Curoil mes lo por karga e periodo aki basta Gobièrnu keda mantené na su afsprak nan.