WILLEMSTAD – Kontrolaria General resientemente a kontestá preguntanan di Parlamentarionan hasí durante e reunion di Komishon Sentral di 21 di novèmber, relashoná ku e rapòrt “Ministeriebreed onderzoek naar naleving van het consultancybeleid in de periode 2011-2019”. Kontrolaria ta splika entre otro ku no ta sin mas por bisa si remplasá konsultornan ku personal di gabinete ta yuda si òf nò. Kontrolaria ademas ta mustra riba e poder di Parlamento mes pa sòru ku ta kumpli ku e maneho di ‘consultancy’.

Parlamentario Gwendell Mercelina di PNP durante e reunion a mustra riba e echo ku gabinete Pisas 2 a subi e kantidat di trahadónan pa kada gabinete di 5 bai 7, ya ku ta mira esaki komo e solushon pa redusí e kantidat di konsultornan. E tabata ke sa di Kontrolaria ku si esaki bèrdat lo yuda. Kontrolaria den un karta na Parlamento: “E pregunta ta si e personal di gabinete por karga ku tur e trabounan pa kua tabata buska konsultor. Lo mester investigá esaki.” Riba un remarke dje Parlamentario Kontrolaria ta splika ku ta masha sporádikamente ámtenarnan ta kita for di trabou pa bai bira konsultor di gobièrnu.

Zita Jesus-Leito di PAR tabata ke sa kiko ta e motibu pa kua e gastunan di konsultor a baha i esaki ta pa motibu pues ku a stòp kontraktnan ku ofisinanan di konseho hurídiko i di abogadonan. Riba e pregunta si Kontrolaria General ta kere ku lo bin kambio real denter di tempu relativamente kòrtiku den kumplimentu ku e maneho di ‘consultancy’ e kontesta ta: “Por mehorá esaki si berdaderamente sòru pa remediá e defisiensianan. E siguiente stap ta pa Parlamento verifiká ku e Ministernan kon nan lo implementá e rekomendashonnan, òf ki medida nan lo tuma pa remediá e defisiensianan.”

Un dje rekomendashonnan di Kontrolaria ta pa pone ekspertonan finansiero den kada ministerio. A hasi esaki entretantu. Pero Jesus-Leito tabata ke sa si Kontrolaria tin bista riba e desaroyo akí i si por indiká si di bèrdat esaki a kondusí na mehorashon òf si tin mester di mas kambio. “Na kuminsamentu di 2023 a nombra financial controllers na 8 ministerio i direktornan finansiero na 5 ministerio.”

Konforme un tabèl ministerio di Asuntunan General (AZ) a haña un direktor finansiero. E ministerionan di Gobernashon, Planifikashon i Servisio Públiko (BPD), di Enseñansa, Siensia, Kultura i Deporte (OWCS), di Desaroyo Sosial, Labor i Bienestar (SOAW) i di Finansa, a haña un kontroladó finansiero. E ministerionan di Hustisia, di Tráfiko, Transporte i Planifikashon Urbano (VVRP), di Desaroyo Ekonómiko (EO) i di Salubridat, Medio Ambiente i Naturalesa (GMN) a haña tantu un kontroladó komo un direktor finansiero. “Na promé lugá ta importante pa yena tur e funshonnan finansiero di tur ministerie.” Na di dos lugá Kontrolaria ta apoyá tur refuerso i ta remarká aserka ku sòru pa e funshonnan akí i e departamentu di ‘Internal Audit’ realmente ta funshoná, ta un siguiente stap sumamente nesesario. “Parlamentu lo por informá serka e Ministernan te kon leu esaki ta e kaso.”