Mester duna konvoinan preferensia pa subi kaya bèk.

Willemstad- Hopi siudadano reakshonando di un manera relativamente negativo pa e echo ku konvoinan tin preferensia na momentu ku nan ‘richtingaanwijzer’ ora nan ta den un parada di bùs indikando ku nan ta bai subi kaya bèk.

Pa medio di un publikashon, un página riba e plataforma di Facebook a indiká ku mester tene kuenta ku konvoinan na momentu ku na ta bai sali for di un parada di bùs pa nan por subi kaya. E konvoinan aki ta mará na un orario ku nan tin ku tene nan mes na dje pa nan por yega nan destinashon.

Den kaso ku outomobilistanan skohe pa no duna e konvoinan aki preferensia, ta pone ku mas nan tin ku keda par’a na e parada di bùs i warda. Esaki ku konsekuensia ku e konvoi no por yega su destinashon na tempu ni tampoko e pasaheronan lo no por yega nan destinashon na tempu.

Diferente komentario ku a wòrdu duná tabata indiká ku outonan tambe tin kaminda di yega na tempu i ku mester traha karetera spesialmente pa konvoinan. Tambe otronan a komentá ku mester splika e konvoinan tambe ku nan por para na e parada di bùs sin ku mester subi kaya. Konvoinan tambe mester hasi uzo di nan ‘richtingaanwijzer’ pa asina por señalá ku nan ta bai subi kaya òf sigui kore. Tin algun sitionan manera banda di pòmp na Brievengat, den Saliña, Santa Rosa i tambe na Rio Canario tin algun sitio ku e parada di bùs ta riba kaminda.

Notabel tabata ku algun persona si tabata konsiente ku esaki ta un regla ku ta aplikabel rònt mundu. Tin persona ku asta a bisa ku segun nan konosementu, vehíkulonan di motor grandi semper tin preferensia. Tambe e remarke a bini dilanti ku e problema ta ku ora bini kambio den reglanan di tráfiko no ta publiká esakinan debidamente pa asina usuarionan di karetera por sa esaki.