Willemstad, ——– Resientemente Korpodeko a introdusí e produkto nobo ‘GOING GREEN’ ku e meta pa ofresé empresarionan e oportunidat pa transformá nan kompanianan den organisashonnan inovativo i resiliente ku enfoke riba desaroyo duradero tantu di nos kompanianan, nos ekonomia i tambe nos medio ambiente. Realisashon di e proyekto aki ta kanando den koperashon ku Aqualectra nos kompania di utilidat di futuro, i su kompania supsidiario Aqualectra Multi Utility N.V.

GOING GREEN ta un di e módulonan di Korpodeko Incentives Programs (KIP)

GOING GREEN ta un di e 6 módulonan di Korpodeko Incentives Programs, esaki ta un programa ku Korpodeko a diseñá spesialmente pa duna empresarionan e sosten nesesario pa krese nan kompania i hasi esaki mas resiliente. Den e kaso spesífiko di ‘GOING GREEN’ e meta ta pa duna finansiamentu na negoshinan pa asina nan por atkerí kapasidat pa ta un partner duradero. Manera ya ta probá esaki na su turno lo ta kontribuí pa baha gastunan di produkshon i operashon (krea efisiensia) i stimulá asina mas invershon di kapital. ‘GOING GREEN’ lo ta disponibel pa tur nos klientenan eksistente i tambe pa klientenan nobo.

Responsabilidat Sosial ku komunidat

Komo Banko di Desaroyo nashonal Korpodeko ta asumí su responsabilidat sosial hopi na serio. Den nos afan pa asistí na desaroyo duradero, nos tambe ke aportá pa hiba nos konsumo energétiko na e un nivel duradero. Den kuadro di esaki nos a bini ta buta mas enfoke riba insentivá empresarionan pa nan tambe asumí e responsabilidat pa adoptá un sistema di operashon mas inovativo, duradero i prinsipalmente efisiente. Netamente pa asistí empresarionan den e proseso aki Korpodeko ta sigui ekspandé su portafolio di produktonan ofresiendo empresarionan e oportunidat pa apliká pa un krédito pa entre otro transformá nan sistema di energia fósil pa un sistema di energia duradero i tambe e oportunidat pa atkerí vehíkulonan eléktriko. 

Kolaborashon Korpodeko i Aqualectra

Pa por hasi e programa di ‘GOING GREEN’ un realidat, Korpodeko a uni forsa ku Aqualectra, ku netamente ta liderando e trayekto pa hiba Kòrsou na un sistema di energia inteligente duradero. Den kuadro di e proyekto ‘GOING GREEN’, Aqualectra lo sostené Korpodeko den analisá proyektonan i konsehá Korpodeko tokante aspektonan tékniko ora empresarionan apliká. Asina Aqualectra i tur kompania ku djòin e esfuersonan aki huntu lo kontribuí na Kòrsou su mishon nashonal pa kubri por lo mínimo 50% di e konsumo energétiko di Kòrsou for di rekursonan di energia renovabel  pa 2035.

Kon bo ta bini na remarke pa nos produkto GOING GREEN

E produkto ‘GOING GREEN’ lo ta un fiansa na 5% di interes komo insentivo pa enkurashá mas empresa pa hasi uso di e oportunidat úniko aki.

Komo ñapa i un insentivo adishonal Korpodeko pa promé biaha lo hasi fiansa PERSONAL eksklusivamente pa kompra di outo eléktriko NOBO na interes for di 4% anual. Pa outonan eléktriko segunda mano tambe lo tin e posibilidat.

Empresarionan ku ta deseá mas informashon i òf ta deseá di apliká pa ‘GOING GREEN Finance’ por bishitá www.korpodeko.cw/going-green. Tambe por tuma kontakto libremente ku nos Development Managernan na Korpodeko durante di orarionan di ofisina via di telefòn 738-1799, WhatsApp 516-3636 òf por manda un meil na [email protected].

Korpodeko, Aqualectra i abo huntu lo sigui avansá den e área ku ya nos a bini ta liderá komo pais ku ta desaroyá solushonnan pa produkshon di energia renovabel den Caribe.