Swin grandi di ‘Coco’ Balentien (4).

WILLEMSTAD—Ayera djaweps dia 2 febrüari 2023, tabata fecha pa inisio di e di 65 edishon di e torneo di beisbòl internashonal, Seri di Karibe, Gran Caracas 2023. Ta trata aki di evento ku ta tuma lugá na Venezuela, ku ta konta ku partisipashon di ekiponan den representashon di 8 pais den Karibe.

Ekiponan

Kòrsou ta konta ku su selekshon, unda nan lo ta den kompetensia ku ekiponan kampion di entre otro Venezuela, Repúblika Dominikana, Puerto Rico, Mexico, Panamá, Colombia i Cuba.

Torneo

Lo bai ta kompetensia ku lo konosé 32 diferente enkuentro, ku tur 8 ekipo enfrentando otro inisialmente, pa seguidamente e mihó 4 nan hunga den weganan di dal saka den semifinal. Aki number 1 i 4 lo topa, miéntras ku ekiponan 2 i 3 ta enfrentá otro. Ganadónan lo pasa pa final, miéntras ku e 2 pèrdèdónan lo lucha pa posishon 3 i 4 di e torneo.

Stadionnan La Rinconada Baseball Stadium na Caracas i Jorge Luis Garcia Carneiro Stadium na La Guaira, ta esenarionan pa e diferente partidonan, durante di e periodo di ayera 2 te ku otro siman djabièrnè dia 10 febrüari 2023.

Apertura

Miéntras tantu, ayera tabatin e apertura, unda ku e selekshon di Kòrsou, ku refuerso di algun di nos peloteronan ku ta hunga den eksterior i den beisbòl di liganan grandi, a enfrentá e ekipo di Agriculteros Las Tunas & Granma for di Cuba, na La Guaira.

E 9 iningnan reglamentario di e enkuentro a finalisá ku e partido empatá 1-1 i tabata den kabes di 10 entrada ku Cuba ta logra kue bentaha di 3-1 i sera entrada, sin pèrmití Kòrsou anotá, pa asina logra triunfo ku skor di 3-1.

Kòrsou

Kòrsou ayera a inisiá ku Darren Seferina komo promé bate hungando na tersera base, siguí pa Ray Patrick Didder (Centerfield), Roger Bernadina (Leftfield), Jonathan Schoop (Segunda base), Wladimir Balentien (DH), Juremi Profar (Primera base), Sharlon Schoop (Rightfield), Dashenko Ricardo (Kècher), Andrelston Simmons (Shortstop) i Cody Mincey tabata e picher habridó.

Kòrsou den bentaha

Kòrsou ta bai ariba, ora ku Sharlon ‘Wecho’ Schoop anotá den bon di 5 entrada. Schoop a yega base ku hit i seguidamente tabata Darren Seferina ku ta empuhá e úniko kareda di Kòrsou.

Nos picheo

Tabata den kabes di 8 entrada, despues ku nos picher refuerso Cody Mincey, a habri i kumpli ku un gran labor di 7 entrada kompletu, ku Shairon ‘Shai’ Martis ta drenta di relevo i Juan de la Cruz ta konektá un bataso ku ta bula waya pa e empate. Finalmente tabata Wendell Floranus, ku ta tèrminá e partido riba montikulo pa Kòrsou, ora e drenta den di 10 entrada.

Nos bateo i resultado

Kòrsou ayera a konektá 6 hit, di kual tantu Sharlon ‘Wecho’ Schoop (3-2), komo Ray Patrick Didder (5-2) a konektá 2 i Jonathan Schoop (3-1) i Andrelton Simmons (4-1), a konektá unu kada unu.

Cuba ta gana 3-1, konektando 9 hit i a hasi 1 eror, miéntras ku Kòrsou a anotá 1 kareda, ku 6 hit i a hunga sin kometé eror. ‘Shai’ Martis a pèrdè, den wega ku entre otro Juremi Profar tabatin un tremendo hugada defensivo.

Próksimo wega

Kòrsou su próksimo enkuentro lo ta awe tardi 6’or, na momentu ku e ekipo dirigí pa Hainley Statia, lo ta enfrentando e ekipo for di Mexico, ku a gana di Repúblika Dominikana 5-4 ayera.