Back to Top
Vigilante banner image

Kòrsou ta basilando ku peliger: reseshon


September 12, 2022 • 2 minüt pa lesa

Índise: for di e tabla por nota kon e kategoria di komestibel ta esun mas ku mas oumento.

Punda—Pais Kòrsou ku un bolsa di kasi 4.3 miar di debe kombiná ku un inflashon den sektor di komestibel riba 8%, tin tur ingrediente pa drenta den un reseshon ku ainda ekonomistanan na gobièrnu ta sin medida.

Hulanda entretantu a konfirmá un inflashon general di 12% miéntras pa e luna aki ta spera Estádos Unídos tambe di anunsiá un oumento di inflashon. E kombinashon di inflashon haltu na Estádos Unídos i Hulanda, lo tin konsekuensha pa Kòrsou. Importando for ámbos pais, ta nifiká ku Kòrsou ta hiba e inflashon importá den su produktonan di konsumo. Na e momentonan aki segun CBS, un rekuento hasi na febrüari 2021 ya tabata indiká un oumento di riba 7% den preis general di komestibel na Kòrsou.

Febrüari 2021, tabata durante periodo di e Covid Pandemia kual pandemia a sigui influensha desaroyo di inflashon rònt mundu. Kombiná ku e guera na Oropa, Kòrsou no ta un eksepshon pa konfrontá problemanan ekonómiko. E problema mas grandi di Kòrsou ta su dependensha riba importashon di kuminda. Esei ta nifiká, mas karu transpòrt i produktonan di promé nesesidat bira internashonalmente, kompanianan importadó na Kòrsou ta den problema pa mantené e kadena di komestibel na Kòrsou riba preis barata. E márgen di ganashi riba e produktonan di komestibel ta bira ménos i kisas tin produktonan ku tei hiba pèrdida fo’i momento nan subi chasis na CPS pa bai depósito.

Segun e último rekuento di Banko Sentral,  Kòrsou su inflashon lo subi  di 3 pa 4% pa alrededor di 6.2% durante 2022. Pero esaki ta índise di inflashon general, sin konsiderá e kategoria di komestibel. Lo no ta un sorpresa si na e siguiente kalkulo riba índise di preis, e kategoria di komestibel (voeding)  lo subi riba 10% òf mas!. E kombinashon di un oumento di inflashon kombiná ku oumento den preis di kombustibel (gasolin, gas ets) ta ingredientenan sero pa konsiderá.

Na Barbados, e gobièrnu tin 2 aña trahando duru kon pa atendé ku nan problemanan di inflashon. Ouspisiá pa nan Banko Sentral, e gobièrnu e duna órden pa hasi un sondeo sientífiko riba e impakto di inflashon na e pais karibense. A resultá ku 74% dje poblashon ta bai kambia nan komportashon di kompra debí na oumento di preis general, prinsipalmente den e kategoria di komestibel. E gobièrnu a opta pa na dado momento no introdusí plafon di preis, sino pa preferibel fasilitá tantu sektor komersial komo e konsumidó ku ménos impuesto. Di tal forma, Barbados ta eksperimentando ku e idea pa nan mantené e forsa di kompra i di invershon dor di imponé ménos impuesto.

Na Kòrsou debí na restrikshon imponé pa COHO, ehekutá pa e.o. Cft, no por tin fasilidatnan fiskal manera Barbados a hasi. Hulanda via di Cft ta imponé pa Kòrsou kobra mas impuesto, tantu riba e konsumidó (OB)  (LB) (OZB) komo riba e komersiante (WB). E oumento riba mas pago di impuesto miéntras inflashon importá ta oumentá ta ingredientenan inisial pa stanka ekonomia. Pasobra miéntras e konsumidó ta kumpra komestibel na preis 10% mas karu i ta pagando mas impuesto e forsa di kompra ta baha kousando un efekto negativo ku por resultá den un reseshon.

Login