Entrante 12 di aprel 2022 e grupo di riesgo haltu por risibí e di dos booster kontra Covid-19

PUNDA- Entrante djamars próksimo, personanan den grupo di riesgo haltu por risibí e segundo shòt di booster kontra Covid-19 na Sentro di Bakunashon na SEHOS-POLI.

Manera ya ta e kaso na varios otro pais, inkluso Hulanda, Boneiru i Sint Maarten, awor Kòrsou tambe lo kuminsá ku suministro di e di kuater shòt, mihó konosí komo e di dos shòt di booster, kontra e vírus di Covid-19.

Entrante djamars, 12 di aprel 2022, tur persona den grupo di riesgo haltu por akudí na Sentro di Bakunashon na SEHOS-POLI pa risibí  di dos booster kontra Covid-19. Esaki ta posibel di djamars pa djasabra di 8’or di mainta pa 5’or di atardi.

Konforme e konseho di salubridat di Hulanda, personanan ku ta keda kategorisá komo grupo di riesgo haltu ta personanan riba 60 aña di edat, habitantenan di kas di kuido, personanan ku problema di inmunidat i personanan ku síndrome di down.