Difísil: Departamento di Finansas mester skohe kua gastu ta bai kanselá i kua gastu lo keda habrí. Un desishon ku minister di Finansas, Javier Silvania a kalifiká komo “difísil”

Punda—Kòrsou ta drentando un défisit di 60 mion florin, kual na finalnan di Yüli lo ta definitivo. Esaki segun sifranan di likides di gobièrnu. Pa Yüni, minister di finansa a konfirmá e défisit di 10 mion i pa Yüli esaki lo ta por lo ménos 52 mion florin.

Ku e sifranan aki, Departamento di Finansas mester skohe kua gastu ta bai kanselá i kua gastu lo keda habrí. Un desishon ku minister di Finansas, Javier Silvania a kalifiká komo “difísil”. Gobièrnu di Kòrsou a anunsiá ku e programa di NOW ta bai riba un “hold” pendiente un desishon di Hulanda pa suministrá Kòrsou e siguiente “tranche di finansiamentu. Manera ta konosí, Kòrsou a súplika 187 mion florin i Cft a duna konseho pa duna 168 mion florin. Petishonnan pa Sosten Empresarial pa luna di yüni 2021 ta dependé di e siguiente tranche di likides for di Hulanda. MEO no por duna un fecha ki dia empresarionan individual i empresanan lo por hasi petishon di TBZO i NOW pa luna di yüni 2021.

Esaki ta nifiká ku e programa di Sosten durante Covid lo ta riba hold unda gobièrnu lo skapa kasi 21 mion florin. Pa lokual ta trata NOW, te ku desèmber 2021 tin un presupuesto di 6 mion florin mensual pa duna sosten na mantenshon di kupo di trabou i stimulashon di ekonomia. Esei ta duna un total di 42 mion florin ku ta riba un “hold. E pakete total di sosten presupuestá te final di 2021 ta kalkulá na kasi 170 mion florin. Ta trata di 20.5 mion di entre yüli pa desèmber 2021, miéntras pa yüni tabatin un presupuesto di 52 mion florin. Durante Yüni, gobièrnu hasta presupuestá gastunan èkstra di sosten. Esaki inkluso 9 mion florin pa Curaçao Medical Center. Tabatin dòbel presupuesto pa NOW na 6 mion florin i tambe pa TVL, kompensashon pa kostonan fiho.  Ta e intenshon pa dividí e sosten di 168 mion den dos pago, unu di 75.5 mion florin i un di dos 93.5

Un otro opshon sigur riba mesa ta posponé invershonnan. UN suma di 75 mion florin presupuestá pa invershon tambe ta kore peliger. 2021, konforme e presupuesto di likides, Gobièrnu di Kòrsou tin intenshon di invertí kasi 75 mion florin di yüni te ku desèmber. Miguel Jackson, e eksperto públiko enkargá ku e presupuesto pa invershonnan di Gobièrnu a splika durante un rueda di prensa,  pa kada luna tin un suma presupuesto di invershon. E suma ta entre 3.4 mion florin mensual i ta yega te 43 mion florin programa pa desèmber 2021. Kòrsou ke sigui e trayekto di Pakete di pais, konforme akuerdonan firma na novèmber 2020. E programa di invershon no ta forma parti di e Sosten Finansiero for di Hulanda, pero e por wòrdu afektá si Kòrsou kai 168 mion kòrtiku dor di keda sin haña e fiansa.  Gastunan relashoná ku Covid te ku yüni 2021  kosta Kòrsou 160 mion florin. Esaki ta lokual eks Sekretario General di Finansas Públiko Ersilia “Zus” de Lannoy  duna konosé durante un rueda di prensa na Fòrti Amsterdam.