Sithree van Heydoorn.

Gomezplein—Minister di Enseñansa Siensia Kultura i Deporte, Sithree “Cey” van Heydoorn ayera ofisialmente a habri Instituto Nashonal di Kultura.

E apertura a bai den forma ku ayera tabata e promé paso ku Kòrsou a tuma pa  yega na un Instituto Nashonal di Kultura. Ainda falta hopi, pero e promé pasonan a keda tumá ku apertura di un ofisina sentral riba Gomezplein. Manera ta konosí na 2020, Gobièrnu di Kòrsou a ser Kas di Kultura, lagando atras un buraku bastante grandi pa “kulturistanan” na Kòrsou.

Pero e biaha aki e Instituto Nashonal di Kultura ta mas amplio na servisionan kompará ku e Kas di Kultura. Ta  e intenshon pa e Instituto Nashonal di Kultura atendé ku asuntunan mas stratégiko riba maneho i desaroyo kultural na Kòrsou. Pa por a yega na e Instituto  Nashonal di Kultura tabatin diferente pre-tareanan ku mester a tuma lugá. Por ehèmpel, mester instituí un Hunta di Komisario. Na momento ku Sithree van Heydoorn a drenta e ministerio el a atkerí un antropólogo pa por duna sosten na e institushon. Esei ta den persona di Aisha Leer, kende  kana e trayektoria  ku ayera a resultá finalmente na e promé pasonan pa formashon di Instituto Nashonal di Kultura. Huntu ku Aisha Leer tin tambe den e proyekto mas funshonarionan estatal den kultura manera Lisette Sambo Velder. Huntu a kuminsá traha riba e profilnan organisatorio i stipulá kontenido di e maneho.

Pero ayera, tabata e promé bista ku Kòrsou por a haña di su Instituto Nashonal di Kultura. Ta trata di un edifisio remodela riba Gomezplein, unda na e momentonan aki tin diferente kara ku ta representá e kargadónan di nos kultura.