Ta notando ku tin un oumento di gastunan di personal.

Nieuwe Haven,– Entre islanan BES, Aruba, Kòrsou i Sint Maarten, kalkulashon nan ta mustrando ku korte komun tabata tin un oumento di 1.7 mion florin na gastunan di personal.

Den su totalidat korte komun a paga 30.6 mion florin na gastunan di personal. E gastunan ta keda repartí den salario, rekompensa adishonal, gastunan sosial, penshun, seguro di kuido, pago na personal fleksibel i indeksashon salarial. Na 2022 e gastunan salarial tabata 28.9 mion florin, pero na 2023 esaki a bin oumentá ku 1.7 mion florin.

Segun e splikashon di korte, e gastunan di personal ta e gastunan mas haltu di korte si kompará esaki ku otro kategorianan. Tin diferente rason di e oumento ku ta inkluí indeksashon salarial kual a kosta 1.3 mion florin i un oumento na persona flèksibel kual a kosta alrededor di 875 mil florin. Sinembago e gastu haltu di pesonal flèksibel tabata tin di haber ku mester a yena algun vakatura riba forma temporal i a resultá ku a saka hende for di Hulanda pa bin traha. Posishon nan ku mester a sali for di Hulanda ta inkluí sekretarionan di korte i direktor interino pa e proseso operashonal.

Durante un rueda di prensa kaminda e bestür di korte a presentá nan relato anual nan a indiká ku hopi hóben no sa ku por solisitá i traha na korte. “Hopi hóben no sa ainda ku por buska trabou na nan organisashon meskos ku kualke otro kompania lokal. Meskos ku kualke organisashon, nos tambe ketubai tin vakaturanan habrí, pues un súplika a bai tambe na hóben nan pa wak e vakaturanan pa wak si e posishon nan habrí por ta pa nan tambe”.

Un trènt di último tempu ta pa wak kon skolnan sa yena salanan di tratamentu penal pa asina e studiante por informá su mes tokante e prosesonan hudisial. Sinembargo riba dianan habrí di korte, e instituto sa organisá tratamentu sivil i penal kaminda e studiantenan lo fungi hues, abogado i fiskal. Tur e tratamentunan aki lo duna studiantenan un bon bista si un karera den lei ta algu pa nan.