Nieuwe Haven— Hues mr Nijhuis den su veredikto di e kaso Ramon Chong kontra di Promé Minister di Kòrsou i eks formadó, no a subi tereno polítiko. Esaki e magistrado a splika tambe alegando ku no ta kompetensha di korte pa drenta den nombramentu polítiko.

Durante e tratamentu, kual Vigilante a presensha, eks formadó di kabinete Pisas II, Chester Peterson tambe a splika hues mr. Otto Nijhuis, ku den e kaso entamá pa Ramon Chong, Korte di Hustisia no ta e instansha kompetente. “Korte ta kana riba Eis fini den e kaso aki”, e abogado i alabes eks formadó a splika korte durante tratamentu.

Ramon Chong a entamá un huisio sivil kontra di eks formadó Peterson i Promé Minister Pik Pisas pa súplika korte ordená un inisio nobo di evaluashon riba su kandidatura komo minister. Pa por a logra un tratamentu dilanti wes sivil, kual ta kla pa tuma lugá,  Chong a sita pa Pais Kòrsou presentá durante su petishon pa derechi unda konsekuentemente un abogado di pais mester ta presente, pero tambe Formadó Chester Peterson i Promé Minister Pik Pisas. Mester apuntá ku e rechaso di Ramon Chong pa por bira minister, a dependé di desishon i konseho fo’i diferente servisio gubernamental i ámtenar. Formadó, kende ta dependé di e seri di ámtenar no tin influensha riba e rapòrt òf konseho di “rechaso” kontra di Chong. Pero, tabatin un desishon pa no presentá Ramon Chong komo kandidato i e desishon spesífiko ei si a keda enkargá i outorisá pa Chester Peterson den su funshon komo formadó. Chong durante su petishon pa deklarashon di derechi, a apuntá ku ta Peterson a keda sin present’é komo kandidato abase di sierto informashonnan, kual informashon lo e debatí den korte.

E eks formadó a sigui splika korte ku e desishon pa nombra Chong komo minister i ta un desishon polítiko. Ta un kestion di sosionan den koalishon pa trata na yega na un aprobashon si Chong por bira minister. Peterson a splika korte tambe ku Chong no tabata riba lista i no a keda skohe pa representá pueblo sino ta dependé di un nombramentu polítiko pa por bira minister. Chong di su banda a demandá un evaluashon nobo. Hues Nijhuis den su veredikto a splika ku Korte no ta subi tereno di nombramentu polítiko. E hues a rechasá demanda di Chong alegando ku e demandante tabata no atmisibel den su demanda.