DEN HAAG—Estado no por redusí kantidat di vuelonan na Schiphol na máksimo 460.000 ku un areglo temporal.
Asina Korte Supremo a determiná. E gabinete anterior tabatin intenshon di hasi esaki pero a wanta despues di kritika di Merka i Union Oropeo. E hues superior ta konfirmá ku e plana aselerá di redukshon di vuelonan no ta permití. Aktualmente ta permiti máksimo 500.000 vuelo pa aña. E gabinete anterior kier a redusi e vuelonan den dos fase. Pa fin di 2023 na máksimo 460.000 vuelo pa aña i despues 440.000 máksimo via un prosedura di Union Oropeo ku ta dura mas largu. Den e prosedura mester envolví tur stakeholder via diferente rondanan di konsulta.
Kompanianan di aviashon a bai korte, pasobra nan a haña e redukshon rápido na 460.000 vuelo inkorekto. Pa esaki mester sigui e prosedura largu via Union Oropeo, segun e kompanianan. Hues a duna nan rason. Gabinete a bai den apelashon. Korte Supremo a duna gabinete rason. E prosedura Oropeo no ta nesesario. E kantidat di vuelonan por a baha na 460.000. Esaki mester tuma lugá fin di 2024 debí na e retraso di e kaso den korte. Pero a bini kritika di Merka i Union Oropeo. E kompania Jetblue lo a pèrdè derechonan di aterisahe i a pidi outoridatnan merikano pa kita derechonan for di KLM na Merka komo represaya. I Union Oropeo tambe tabata di opinion ku mester sigui e prosedura Oropeo pa e prome plan di redukshon. Bou di preshon di Merka i Union Oropeo gabinete a disidí den novèmber pa wanta e plan di redukshon i start e prosedura largu via Union Oropeo. Pero entretantu KLM a bai kasashon kontra e veredikto di Hof. Pues e kaso a bai Korte Supremo. Entretantu hues a duna veredikto den un otro kaso entama pa habitantenan den área di Schiphol ku a eksigí medida kontra e molester. Hues a determiná den mart ku estado mester proteha habitantenan mihó kontra molester i denter di un aña. E gabinete anterio a konsiderá pa apela e kaso. No ta konosí kiko e gabinete aktual kier hasi ku Schiphol. Den e akuerdo di koalishon ta inkluí ku den próksimo añanan mester pone prioridat na protekshon di habitantenan ku mantenshon di kalidat di e ret di Schiphol. Asina riba termino largu ta posibel pa krese ku avionnan mas silensioso i pa kumpli ku medio ambiente.