Universidat di San Martinus.

Punda—International Health Care Holding BV ta un kompania ku ta manehá Universidat Médiko San Martinus. Momento, gobièrnu a anunsiá lockdown e universidat a kometé e fayo di manda tur studiante bek nan kas i sigui kursonan online. Korte a duda si e desishon aki tabata a mala fe òf si en bèrdat mester a sera e universidat. Un empleado, kende a wòrdu retirá a gana e International Health Care den korte.

Na mart último, despues ku gobièrnu a anunsiá e lockdown di 6 siman pa motibunan di Corona vírus, Universidat Médiko di San Martines a manda bisa tur studiante pa bai nan kas bek, esta nan pais. Un kantidat di studiante a protesta kontra di e desishon i manda karta bek pa splika International Health Care ku ta manehá e universidat, ku nan ke keda Kòrsou sigui studia. E universidat a splika e studiantenan ku nan ta kore riesgo i ta mihó bai nan pais i sigui e kursonan online. Ta trata di kasi 70 studiante, for di kual solamente 7 a keda sin paga nan finansiamentu di skol. Tur mester a bai i San Martinus a sigui ópera online, algu ku korte a duda si e desishon tabata pa malesa finansiero dje skol òf pa motibunan di Covid. Esaki ta un punto hopi importante den e veredikto.

E operador diario, “concierge”  ku ta kuida e skol i manehá mantenshon, pa finalnan di aprel no a risibi su salario. E empleado a manda un karta pa súplika su salario i demanda ku esaki ta riba su kuenta promé ku 6 mei 2020. International Health Care a manda bisa e empleado ku debí na Covid nan no por paga su salario i ku San Martinus no a bin na remarke pa NOW. Despues di diferente karta, e empleado a laga pone beslag riba un kuenta di 200 mil florin ku e universidat/International Health Care tabatin na banko. Ora esaki a sosodé, e kompania a opta pa paga 50% dje salario di aprel. E kaso lógikamente a yega korte.

Riba 9 di yuli último e la wòrdu trata den korte sivil na Kòrsou, unda mr. Molly Steward a defendé e empleado i Bijkerk a defendé e universidat. Despues di a skucha e partidonan, korte ta konkluí ku San Martinus i International Health Care no tabata por a kombensé ku impaktonan di Covid a kousa e konflikto. E universidat riba su mes desishon a opta pa manda tur studiante kas i kore riesgo, esaki apesar ku kasi tur a paga nan finansiamentu di kolegio kaba. Korte ta sinti ku International Health Care tabatin problema promé ku e Viro di Corona  a yega Kòrsou.

Konforme kódigo di prosedimentu sivil, un empleado no por sufri sin mas di no risibi su salario, sea ku ta pa motibunan for di alkanse di tantu e empleado komo e dunadó di trabou.  International Health Care mester sigui paga salario pasobra e periodo di lockdown tabata kòrtiku i solamente 6 siman, lokual segun korte tabata prematuro pa manda tur studiante kas. Korte ta haña ku e promé simannan di lockdown mester ta na enkargo di riesgo di e dunadó di trabou i no empleado. Mas aleu, por nota fo’i sifra di e kompania ku ta for di yanüari e universidat tabata den problema, pues segun korte no ta e viro so a kousa problema. Korte a ordená e kompania pa paga e salario di empleado durante su periodo di kontrakt ku ta novèmber 2021.