Bashí: for di yüni 2020 a saka tur dama for di e sitio.

NIEUWE HAVEN—Despues di bastante aña i un siman di posponementu, korte ta trata un biaha mas pa trata un kaso ku ta regardá Campo Alegre e siman aki. Ta trata di un diskushon ku for di 2008 ta andando.

E kaso ta trata un demanda ku Gobièrnu di Kòrsou tin kontra di e kompania Wilshire Advisors. Wilshire Advisors Ltd. a keda kondená den korte pa paga 14.219.548 florin i Campo Alegre CV i 11.040.806 florin, pues un total di 25 mion florin. E siguiente aña despues dje sentensia a asesiná un dje doñonan Giovanni van Ierland. E tabata forma parti di Wilshire Advisors.Den e kaso ei tabatin mas kompania embolbí, esta Krisia NV, Curaned Vastgoed NV i Talisa NV. Nan tambe a keda kondená den Korte di Promé Instansha riba 22 di yüni 2007. Tantu Krisia komo Talisa a keda kondená pa paga 2.250.000 florin nan kada unu, pero Korte Superior a destruí e sentensianan ei. E kompanianan aki tabata sosio general di Campo Alegre CV. i un simpel kapa pa e vehíkulo di labamentu di plaka mes, esta Wilshire Advisors.

E kaso aki a sigui kologá den laira pa hopi tempu.  Na e momentunan aki, tin un problema tambe pa bende Campo Alegre. Campo Alegre tabatin miónes na debe i medidanan di Corona a pone ku esaki tambe a kousa debenan astronómiko. Minister Públiko kier bende e lugá na vindishi pero esaki a keda posponé. E sèn ku e vindishi generá lo mester  bai den e fondo di krímen. E motibu pakiko gobièrnu kier koperá pa e lugá habri bèk, ta e mesun motibunan i 71 aña pasá. Prohibí prostitushon den kayanan di Kòrsou i den nos sentro di suidat i tambe kombatí enfermedatnan venériko. Departamentu di hustisia, sinembargo ta duna atenshon spesial na trato di ser nan humano i muhé nan atraves di Campo Alegre.

Tabatin un bid planeá  pa start na 8.9 mion florin. Ministerio Públiko ku ta ehekutá sentensianan, ta esun ku den e kaso aki a duna kantor di notario Simon & Steenbaar órden pa bende resort kaminda tabata pèrmití prostitushon. Den e kaso aki Ministerio Públiko ta ehekutando e sentensia di ekspropiashon di Korte Superior di 20 di novèmber 2008. E doñonan di Campo Alegre, esta Wilshire Advisors Ltd. establesé na Tortola, British Virgin Islands i e eksplotadó Campo Alegre CV, a keda ekspropiá di mas di 25 mion florin, ku mester bai Estado di Antia Hulandes, manera e sentensia ta indiká.