Willemstad,– Manera Kuerpo Polisial ya a indiká anteriormente, no ta bai tolerá ponementu di ‘fever’ riba kaminda públiko.

E infrakshon aki ta kontra e ordenansa di tráfiko i aparte di ta opstakulisá tráfiko, e ta un peliger pa tantu e ponedónan di ‘fever’ komo mirones i otro personanan ku ta trafiká den e besindario ei. Pa para e desordu aki, polis tin mester di yudansa di komunidat.

P’esei ta hasi un apelashon na komunidat pa esunnan ku tin imágen nan di ‘fever’, sea potrèt of filmashon, pa suministrá esakinan na polis, di manera ku polis por aktua di e forma ei tambe, kontra esnan ku ta hasi nan mes kulpabel na e infrakshon aki.

Por baha e imágennan riba e wèpsait di Kuerpo Polisial Kòrsou ku ta www.polis.cw i despues klek riba ‘Hasi denunsia’. Na momentu ku polis risibí e imágennan, esakinan lo keda analisá pa un tim ku ta dediká na esaki i despues polis lo aktua severamente kontra esnan enbolbí. Di antemano polis ta gradisí tur siudadano pa kumpli ku nan deber síviko.