Back to Top
Vigilante banner image

Krísis klimátiko i pandemia a oumentá infekshonnan di 'schimmel'


October 29, 2022 • 2 minüt pa lesa

Segun WHO, mester priorisá infekshonnan kousá pa ‘schimmel’ mas mirando ku nan por ta mes òf mas severo ku demas infekshonnan.

PUNDA- Debí na kambionan klimátiko i e pandemia di Covid-19, WHO a publiká ku e siguiente menasa pa salú públiko ta e oumento raportá den kasonan di infekshon di ‘schimmel’ dañino.

Mundialmente infekshonnan di ‘schimmel’ ta mata alrededor di 1.7 mion persona anualmente, kual ta muchu mas ku enfermedatnan konosí manera malaria i tuberculosis. Durante Covid-19, pashèntnan hospitalisá a keda infektá ku variantenan resistente di ‘schimmel’ kual a hasi e infekshonnan muchu mas pió. Ademas, debí na temperaturanan ku ta oumentando pa motibu di krísis klimátiko tambe mas i mas espesienan di ‘schimmel’ ta logra ekspandé i asina infektá mas hende.

Apesar di e riesgo kresiente, mundialmente ta un kantidat chikí ta keda invertí den investigashon kontra enfermedatnan kousá pa ‘schimmel’ kompará ku enfermedatnan kousá pa bakteria, vírùs òf parásito. Pa e motibu aki Organisashon Mundial di Salú (WHO) a publiká pa promé bia den historia un lista di enfermedatnan di prioridat ku ta keda kousá pa infekshon ku ‘schimmel’ i ta kousa un menasa pa salú públiko. 

Entre e 19 tipo di ‘schimmel’ ku ta kousa menasa pa salú, WHO a suprayá 4 ku ta keda konsiderá prioridat krítiko debí ku nan ta esnan ku mas mester tene kuenta kuné mirando e gran impakto ku nan por tin riba salú públiko i e riesgo di resistensia kontra tratamentu.

Ta trata aki di Aspergillus fumigatus, kual ta un ‘schimmel ku ta plama via airu i ta afektá prinsipalmente pulmon. Síntomanan di infekshon ku Aspergillus ta similar na asma, pues pèrdida di rosea, tosamentu i piepmentu ora ta hala rosea. Segun datos, infekshon ku e ‘schimmel’ tin un tasa di mortalidat haltu, matando entre 47 pa 88% di persona ku keda infektá kuné.

E di dos ‘schimmel’ ta Candida albicansb, kual ta un ‘schimmel’ ku ta keda enkontrá den tripa i boka di mayoria hende. Sinembargo, Candida tin e kapasidat pa kousa un infekshon invasivo ku por resultá severo pa pashèntnan ku un sistema inmunológiko pèrhudiká.

E terser ‘schimmel’ ta Cryptococcus neoformans ta keda enkontrá normalmente den naturalesa, spesialmente den pupu di para. Na momentu ku un persona keda kontagiá ku Cryptococcus neoformans e ‘schimmel’ aki por infektá serebro di un persona.

Por último tin Candida Auris, kual ta un ‘schimmel resientemente nobo detektá ku ta resistente kontra mayoria tratamentu médiko. Den temporada di e pandemia di Covid-19, tabatin varios kaso raportá di personanan severamente infektá ku Covid ku a pega ku e ‘schimmel’ aki tambe mientras nan tabata hospitalisá.

Login