Kontakto: por spera hopi kontakto entre prensa lokal i KSE.
Skalo—E periodo aktivo pa preparashon di elekshon 2025 a inisiá i Konseho Supremo Elektoral ta asumiendo un posishon pre aktivo pa lokual ta trata aserkamentu ku prensa.
Awe den oranan di mainta, lo tin un seshon di informashon ku prensa lokal. Direktor di KSE, Sheryl Losiabaar ta di profeshon komunikado, lokual ta un situashon pa suministrashon di informashon. Den nos Reglamento di Votashon, no tin eksistensia di un Registro di Votadó, lokual ta nifiká ku e sifranan pa derechi riba voto mester bini di Kranshi. Nos Reglamento di Votashon ta den un lei ku ta regla i ordená tur lokual tin di haber ku elekshon.
E Reglamento di Votashon ta produkto di nos Areglo di Estado ku ta stipulá ku den nos demokrasia mester tin elekshon pa skohe nos parlamentarionan. I kon e eskoho mester tuma lugá ta reglá den nos Reglamento di Votashon. E Konseho Supremo Elektoral no ta hasi nada pafó di e Reglamento di Votashon. Ta un reglamento amplio ku den detaye ta splika i ordená kon tur kos mester tuma lugá pa por yega na resultadonan di elekshon. E tin tambe diferente referensha na diferente artíkulo den lei. E lei ta bisa ku 30 dia promé ku e fecha di entrega di lista, e hendenan ku tin inskribí na Kòrsou esun 30 dia promé, esei ta e hendenan ku por vota na elekshon benidero.
Pa e motibu ei, 30 dia promé ta kuminsá konta for di 23 di Yanüari 2025 bai bek te na 24 di desèmber 2024. 23 di Yanüari 2025 ta fecha stipulá pa entrega di lista. Entre 23 di Yanüari 2025 pa 24 di desèmber 2024 ta nèt 30 dia. Pues, e Registro di Votadó a sera riba 24 di Desèmber 2024 miéntras entrega di lista lo ta 23 di Yanüari próksimo.