Hefe di Kuerpo polisial i Minister di Hustisia no por a kere ku e alumnonan lo derota e polisnan.

Willemstad—- Ayera algun miembro di Kuerpo Polisial Kòrsou tabata presente na Kolegio Alejandro Paula na unda bai pa duna informashon pa loke ta trata di e trabou di polis i alabes enfrentá e alumnonan den un partido di futbòl di sala.

Un grupo di polis a hasi bishita na  Kolegio Alejandro Paula pa asina konsientisá e hóbennan aki ku den Kuerpo Polisial Kòrsou tambe tin trabou di nan. Inspektor di Polis Daniel huntu ku Antonia a duna un splikashon kiko e trabou ta enserá. Na final di e splikashon a bin ku un challlenge entre algun miembro di Kuerpo Polisial i e alumnonan di KAP ku mester a pasa un tèst di spòrt ku sa wòrdu ehekutá na momento ku solisitantenan kier drenta Kuerpo Polisial Kòrsou. Loke a resaltá ta ku e alumnonan di KAP sigur a sa di demostrá ku nan ta den tremendo kondishon i a superá e polisnan durante e prueba di spòrt. Seguidamente a sigui pa un enkuentro di futbòl di sala na unda  un biaha mas e alumno nan di KAP a mustra nan dominio tambe ku bala i a derota e polisnan ku un skor di 5-0. Tur esaki a tuma lugá miéntras ku Minister di Hustisia señor Hato i tambe Hefe di Kuerpo Polisial señor Ellis tabata para wak sin por a hasi masha pa nan trahadónan. Sigur tabata un bon dia na Kolegio Alejandro Paula unda e alumnonan por tabata muchu mas serka di Polis i alabes a wòrdu konsientisá kiko ta e trabou di polis i ku tin trabou pa nan tambe den Kuerpo  Polisial Kòrsou.