Piscadera —- Un grupo organisá of ladron, ta uzando mondi di Piscadera pa skonde outo. Den fin di siman na dos okashon a bolbe haña outo hòrtá skondí den e mondi.

Polis mester a bai den un mondi na Piscadera unda a bin topa ku un vehíkulo prosedente di ladronisia. Den oranan di djasabra mainta polis a hañá e informashon ku den un mondi na Piscadera mester tin un vehíkulo. Ta trata di un vehíkulo marka Kia Rio prosedente di ladronisia. Polis a bai mesora na e sitio indiká unda a bin hañá e vehíkulo i tambe a bin topa ku un hòmber kual a keda detené na e sitio mes. Polis a konfiská e vehíkulo bai warda kuné pa mas investigashon.