Minister Cooper ta informá ku mester amplia e merkado laboral di transporte ya komo tin ku akohé e kantidat di turistanan ku a subi durante aña.

Willemstad, — Den reunion di komishon sentral na parlamento djamars dia 21 di novèmber último, minister Cooper di VVRP  a duna di konosé ku turistanan a subi, pero ku no a adaptá lei di Personenvervoer pa asina transportá e kantidat di turista ku a subi.

Minister Cooper di VVRP a kompartí ku e lei Eilandsverordening personenvervoer ta datá for di aña 1969 i ku esaki no a kambia mashá denter di 31 aña. E lei aki ta kubri 4 grupo grandi ku ta hasi uzo di karetera kual ta bus, tourwagens, taksi, i personanan ku ta haña eksonerashon pa ofresé transporte.  Minister Cooper a menshoná ku e lei ta duna di konosé ku tin un máksimo di 15 pèrmit i kada un vergunninghouder tin mag di tin un máksimo di 5 vehíkulo.

Pa loke ta trata taksi, minister Cooper a indiká ku e lei ta bisa tambe ku e lei ta dikta ku tin mag di tin 200 taksi ku ta transportá máksimo 9 persona ekskluí e shofùr. Pero minister Cooper a kompartí ku den aña 50 ora ku a bini ku e promé lei di bus, e poblashon ku tabata hasi uzo di karetera  tabata diferente  kompará ku awor. Minister Cooper a indiká ku aktualmente nos tin alrededor 90.000 vehíkulo riba karetera.

Minister di transporte a indiká den kaso di turista ku ta hasi uzo di transporte, ku miéntras e kantidat tabata  subi durante e añanan e kantidat di taksi i toerwagens no a subi. Sifranan di CBS ta duna di konosé ku na aña 1950, tabatin alrededor di 15.000 turista. Na aña 1960 tabatin 60.000 turista, na aña 1970 tabatin 100.000 turista, i últimamente minister Cooper a kompartí ku Kòrsou a haña mas ku 400.000 bishitante.

Ku esaki e minister di VVRP a bisa ku esaki ta un di e motibunan dikon lo tin ku amplia transporte pa tin mas persona ku ta laborá den e merkado aki i asina fangu e kantidat di turista ku ta hasi uzo di transporte. Ku no trese kambio den e lei di Personenvervoer di aña 1969 no por transportá turistanan ku ta bini i bishita Kòrsou i esaki por afektá nos turismo.