Punda,– Korte di hustisia a trata un kaso penal kaminda doño di dos pitbull a keda ordená pa manda e kachónan drumi pa semper. Esaki tabata despues ku e kachónan por poko a kosta bida di un bisiña.

Tabata na komienso di Aprel na momentu ku un bisiña ku fam R. tabata kana den su kaya, kaminda dado momentu dos kachó di rasa Pitbull a atak’é kaminda te ku awe e víktima tin problema ku su leshon nan. Den e kaso aki e víktima a ser morde na orea, kakunbein, brasa, pia i asta na su testíkulo.

Apénas 6 luna despues na komienso di ougùstùs kachónan di rasa Pitbull a bolbe morde un víktima basta pisá. Tabata trata di un kaso ku a sosodé den e bario di Jongbloed. Segun informashon, e víktima tabata kana den un roi, kaminda dado momentu un kantidat di Pitbull a sali for di kurá i morde e víktima. Sinembargo, e doño a hasi su máksimo pa lòs e kachónan for di e víktima, kaminda asta e doño a risibí vários mordé di su kachónan.

Despues di e dos susesonan aki por a konkluí ku e lei pa prohibí e rasa Pitbull no ta wòrdu ehekutá. For di 2008 tin un lei ku ta prohibí e rasa di pitbull na Kòrsou. E lei ta dikta ku tur doño di un pitbull mester sterilisá nan bestia i chip esaki ku meta pa redusí e poblashon di e rasa di kachó aki. Tambe e lei ta indiká ku personanan ku no kumpli ku e lei stipulá por kai será pa 10 dia òf lo mester paga un multa di 5 mil florin. Aunke formalmente e medidanan ta den vigor, Ministerio Públiko ni outoridatnan no ta aktuando manera mester ta segun deklarashon nan di Stanley Ignacio na Yanüari 2022.

Na 2022 Ignacio a indiká ku e solushon ta pa Ministerio Públiko duna òrdu pa atendé ku e kachónan aki. Komo ku ántes tabata risibí basta keho kontra di e rasa aki a opta pa introdusí e lei na 2008. Te na 2013 e situashon tabata bou di kòntròl, pero Ignacio a indiká na 2022 ku aktualmente tur hende a bai drumi i laga e lei aki para.

Tur esten e lei no tabata den ehekushon, por a nota ku a sigui bende e rasa. For di un investigashon, por nota ku e rasa a kuminsá lanta kabes bèk na Kòrsou. Ta asina ku tin asta negoshinan pa bende e rasa aki, Mas aleu, e negoshinan ta bende e kachónan aki pa un preis averahe di 3500 florin kual sigur ta remarkabel.  Un grupo di eksperto di kachó a indiká ku e rasa di e kachó no ta e problema, pero e edukashon i sosialisashon di e kachó ta importante.

Kuantu víktima mas mester kai promé ku e lei ta keda ehekutá strukturalmente ta keda un pregunta prinsipal.