Back to Top
Responsive image
E korant di pueblo

Lei Seku mester konta pa un i tur no pa benefisiá sierto komersiantenan so


December 9, 2020 • 3 minüt pa lesa

Lei seku mester ta konta pa tur hende no pa un grupito so.

Otrabanda- Vigilante a hiba un kombersashon ku Fransisco de Freitas kende ta propietario di Plasa Snek pa loke ta trata e situashon ku tin rondó di Lei Seku.

Sr. Queño a splika ku e situashon pa basta tempu ta malu kaba kaminda ku nan ta konfrontando masha problema pa loke ta trata e desishonnan ku Minister ta tuma i ku bo tin ku respetá eseinan. E desishonnan na su opinion ku ta keda tuma pa benefisiá e komersiante grandinan i esnan mas chikitu ta sufri tur e konsekuenshanan. Na momentu ku bo pone un lei bo tin ku tene na kuenta ku e ta konta pa tur, no pa un grupo so. Pa loke ta trata e komersiantenan por sobrebibí. E la sigui splika ku nan den kayanan di Otrabanda komo komersiante ta pasando momentunan hopi difísil ku e asuntu di Covid 19 i tambe lockdown ku tabatin.

Stulnan bashí i ku ta lucha nan ta lucha pa por sobrebibí i ku tin biaha esaki mes no ta yega pa por paga e gastunan. Tokante di e Lei Seku esaki a kaba di mata e komersiante chikí kompletu. Ekonómikamente no tin sèn, ekonomia ta malu, hendenan ta pèrdè trabou i muchanan tin hamber i awor ta bin ku e lei ku esaki bo por bisa ku e ta e di dos lockdown nechi bisa. Ta keda kulpa e pueblo ku ta nan no ta komportá su mes i ku ta via di dje e vírus ta keda multipliká su mes, pero di otro banda pa keda benefisiá komersiantenan mas grandi ketu bai ta laga pasaheronan bin for di Hulanda i Merka. Despues ta  e Pueblo ke tene na dje, kaminda ta pone ku e snèknan no por bende bibida alkohóliko, pero supermarket i minimarketnan si. Nan ta kumpra e alkohòl bai sinta algun meter leu for di e minimarket bebe òf ta bai kas ku esaki kaminda mas hende ta bini huntu.

E pániko ku ta keda krea ta serka esnan grandi di edat ku ta mas vulnerabel pa e malesa. Na kas no por kontrolá kuantu persona tin. Ta hende grandi i tambe esnan ku ta sufri malesa króniko ta esnan ku mas ta vulnerabel ku e situashon por kosta nan bida. E desishon tuma no ta responsabel paso dia pa dia ta mas i mas kasonan ta keda bin aserka. E la sigui splika ku e no ta komprondé ku ke kuida nos hendenan òf laga e ekonomia keda habri pa benefisiá algun komersiante grandinan. pa loke ta trata e Lei Seku mester yega na un liña, no hanchu un banda i pa otro smal. Si ta e bebementu ta e problema ku ta kousa aglomerashon i ku ta pone ku e vírus ta plama, e lei seku mester ta pone tur kaminda ku no ta bende bibida niun kaminda. No ta asina ku ta kita esakinan for di snek i barnan, pero tòg por kumpr’é den supermarket i minimarketnan tòg. Queño a duna di konosé si e komo komersiante mester sakrifiká pa salu di otro lo e ta dispuesto na hasié.

Pa loke ta trata e pidimentu di e yudansa di NOW e mester a pidi esaki pero te na e momentunan aki no a risibí yudansa. Ta hopi komersiante a pidi den área di Otrabanda pero a komprondé ku ta un kantidat so a risibí. Tambe e la sigui bisa si bo keda sinta warda riba esaki bo no ta keda kla, bo mes mester ranka aki, huña aya pa por keda kla. E la terminá bisando pa esnan ku tin ku tuma desishon no ta tur biaha bo tin ku wak e sèn, pero mester wak e bienestar di e pueblo spesialmente pa nos grandinan. Mester analisá wak kiko por i kiko no por, ni no wak ki desishon otronan ta tuma. si sigui asina ta Lockdown ta bin i ku mas morto lo kai pa e situashon aki. Kada ken mester tene kuenta ku e situashon ku nos ta aden.

A pidi yudansa di NOW pero te ku awe nada pero ta hibando pèrdida tur dia.
Login