WILLEMSTAD – Na momentu ku introdusí e Landsverordening normering topinkomens (LNT), ta drenta na vigor tambe e obligashon di publikashon. Esaki ta nifiká ku e entidat mester entregá un informe finansiero di tur funshonario altu ku pa medio di un dekreto ministerial tin un salario mas altu ku lei ta stipulá. Lo publiká e informe akí den Landscourant pa henter pueblo mira. Asina gobièrnu ta splika riba pregunta di Parlamento hasí anteriormente durante un reunion tokante e entidatnan gubernamental.

Durante e reunion e miembronan di Parlamento a para ketu na diferente konsekuensia di e lei akí despues ku e drenta na vigor. Riba e pregunta si gobièrnu ta konosí ku maksimalisashon di entradanan den tur entidatnan gubernamental ku no ta supsidiá pa gobièrnu por kondusí na ménos entrada (di impuesto), gobièrnu ta kontestá ku e pregunta ta kiko ta pisa mas: entrada di impuesto komo konsekuensia di ekseso di pago di salario òf standarisashon?

“Ora ku gobièrnu skohe pa un sierto maneho, mester hasi algun eskoho. Relashoná ku esaki a skohe pa kombatí salarionan i plakanan di retiro eksesivo na instansianan afiliá na gobièrnu. Esaki ta trese kuné ku na final dje periodo di transishon algun funshonario den tòp lo tin un redukshon den nan salario pa por alkansá e máksimo salarial standarisá. Ménos salario ta nifiká tambe ménos entrada, ku ta trese ménos impuesto di entrada i impuesto di ganashi, pasó e funshonario tòp tin ménos pa gasta. Pero e pregunta ku ta lansa ta, e entrada di impuesto komo konsekuenshia di salario eksesivo ta pisa mas ku e standarisashon? Esaki ta e eskohonan ku nos mester hasi komo komunidat.”

Riba petishon di Parlamento gobièrnu no por a hasi un kalkulashon pa loke ta trata impuesto di entrada, prima di AOV i seguro básiko, ni kiko esaki lo nifiká pa (kaha di) gobièrnu. “Gobièrnu no por hasi e kalkulashon akí, pasó ainda no tin un bista di e kantidat di funshonarionan tòp i nan respektivo salarionan. Na momentu ku introdusí e obligashon di publikashon (publicatieplicht reglá den artíkulo 10 dje ordenansa), por entregá sifra.” Segun gobièrnu ku tur probabilidat por konkluí ku e standarisashon lo tin efekto pa un total di masoménos 10 entidat. Ta trata di e entidatnan ku a entregá Parlamento un reakshon formal den nan karta fechá 9 di sèptèmber 2022 huntu ku Banko Sentral CBCS, riba e reunion di tres dia promé tokante e konsepto di lei LNT.

Parlamento a para ketu na e posibilidat ku ekspertonan ta bandoná Kòrsou despues ku introdusí e lei i bai traha por ehèmpel Boneiru. P’esei e pregunta tambe si a hasi un kalkulashon di e entrada tòp na Boneiru, pa evitá ‘braindrain’ komo konsekuensia. Esaki ta e fenómeno ku personanan ku nivel altu di edukashon ta bandoná un pais (den desaroyo) pasó na otro pais tin entradanan mas altu. Segun gobièrnu Boneiru no tin un stándar legal di salario máksimo. Aruba sí i esaki ta 329 florin. Sint Maarten tambe tin un stándar legal awó. Gobièrnu mes no ta splika mashá mas tokante esaki, pero Promé Minister Silveria Jacobs di Sint Maarten a bisa na yüni aña pasá ku nan a pasa e LNT for di 2020 i awor a yega e momentu pa kita e kondishonnan salarial di e empleado públiko dje pais ei.