Minister di Hustisia Shalten Hato a entregá un areglo ministerial pa prohibí e asina yamá ‘lachgas’.

WILLEMSTAD – Minister di Hustisia Shalten Hato a entregá un areglo ministerial pa prohibí e asina yamá ‘lachgas’, pendiente pa e trayekto di adaptashon di lei di Opio. Minister di Salubridat, Medio Ambiente i Naturalesa (GMN) Javier Silvania a tuma e areglo pa prohibí ‘balòn’ for di mannan di Hato siman pasá.

E situashon di (posibel) adikshon na e tipo di gas akí ta preokupante pa hopi den komunidat. Parlamento tambe a tuma akshon. Manera Vigilante a publiká na mart último, Parlamentario Giselle Mc William di frakshon di MAN a manda un karta ku 7 pregunta na Minister Hato tokante uso di ‘lachgas’ i sigarianan elektróniko dor di hóbennan. E ke pa e Minister splika kiko e ta bai hasi ku e problemátika akí.

E Parlamentario a manda su karta ku e tópiko ‘prohibishon di importashon i kompra di ‘lachgas’ pa konsumo komersial’, dos dia despues ku e Minister a anunsiá su guera. Segun Mc William ta importante pa prohibí importashon i benta pa uso rekreativo di lachgas mas lihé ku ta posibel i buta esaki riba e lista di e asina yamá Opiumlandsverordening, ku ta e lei anti-droga.

Mc William a hasi su preguntanan dos dia despues ku Minister Hato a anunsiá su guera kontra e problema akí. Ela informá ku a kuminsá e trayekto pa prohibí uzo di lachgas ku e meta pa protehá esnan ku ta uzo di esaki, en partikular nos hóbennan. “E lei pa prohibishon di lachgas ta sumamente importante mirando e dañonan permanente ku esaki por kousa serka usuarionan. For di promé di yanuari 2023 lachgas ta prohibí na Hulanda i mas pais den Oropa ta den proseso pa implementá e prohibishon aki. E prohibishon aki ta nase despues di vários investigashon sientífiko ku a konkluí ku lachgas por tin efekto severo permanente riba selebre di usuario. Mirando e tendensia ku den varios klup nokturno ta bende e asina yamá balòn ta imperativo pa un gobièrnu responsabel pone un paro na esaki.” 

E prohibishon di “lachgas” por yuda outoridatnan kompetente enormemente pa tuma medidanan inmediato kontra usuarionan di “lachgas” di forma di rekreashonal i ta kore ku bòternan di e “lachgas” den outo. Uzo di lachgas tin asta efekto riba komportashon den tráfiko di e usuario. Ku suerte, asta hopi aksidente den tráfiko por keda prevení. Asina Minister Hato a enfatisá.